A ‘ne vèye mohone
Brâve vèye mohone dè bon vî tins,
avou t’ sèyeûte dihâmonêye
èt t’ panse qui boute dizeû l’ pavêye,
dji n’ sé vrêy’mint çou qui t’ soutint !
Dj’a todi-måy sogne å matin
di t’ trover pètêye à l’ valêye,
brâve vèye mohone dè bon vî tins,
avou t’ sèyeûte dihâmonêye.
Hoûte chal : mi vous-s’ rinde bin contint ?
Dimeûre co là bin dès-annêyes,
dimeûres-i po bouter m’ pwèsêye
et loukî passer mi-ètér’mint,
brâve vèye mohone dè bon vî tins !
Note Wikisourd
Dins Li pan dè Bon Diu, 1î eplaidaedje, Lidje, 1914, p. 36, riprins dins l’ grosse antolodjeye Piron, Mardaga, Lidje, 1979, p. 262.