V’la véngt-cénq-ans qu’ nos rëv’nîne à l’ Basse Auve,
L’ grande pwate au laudje, au laudje à deûs batants.
È r’passant l’ sou, djon.nias, djon.nes èt vîs « chauves »
Nos v’nîne à l’ fièsse d’on passé d’ cénquante-ans.
Ô ! l’eûre bènîye, l’eûre ou ç’ qu’on së r’troveûve :
« Tin ! quî vola ! Todë lë… mins tchènë ! »
Èt, sins pus d’ conte, vîs cosses, on s’ rabrèsseûve,
Au pës bënauje dë s’ veûy dins lès rëv’nës.
Là véngt-cénq-ans, nos vèyîne à l’ vîye tauve
Onk dès-ancyins au mëtan d’ sès-èfants
Onk dès prèmîs qu’arëvîne à l’ Basse Auve
Lë prëmî djoû, ’l avot d’ ça cénquante-ans.
Dès complëmints à lî fé toûrner l’ tièsse,
Ènn’a-t-ë r’çût ! Ël èstot radjon.në :
C’èstot co l’ min.me sous-diyake à l’ grand-mèsse,
L’ curé d’ Saint-Pô lë min.me èstot rëv’në.
On quârt di siéke a passé d’ssës nosse tièsse,
Èt maugré ça, n’èst-ç’ nén l’ cœûr dë-d-todë,
Djon.ne tant qu’ë faut por on së bia djoû d’ fièsse
Qu’à l’ chére maujone nos ramin.ne audjoûrdë.
Djë comprind bén qu’on vôrot co qui dj’ tchante :
Lë vwès èst vîye, l’instrëmint èronë :
Mins sèptante-cénq′, c’è-st-aute tchôse que cénquante,
Vîve lë Basse Auve èt sès-èfants rëv’nës !
Nosse cardënal èt sès deûs grands vëcaîres
Tos nos doyéns èt bén d’s-autes grands sègneûrs,
S’è fiant one glwêre, èstîne au séminaîre :
Dès grandès djins, grande fièsse èt grands-oneûrs.
Ça fieûve plaîjë, on clatcheûve plin sès paumes :
Nos profèsseûrs, së l’ côp, nos-ont r’conë
Èt l’ vî Pâquèt, Kayor èt l’ grand Guiliaume
Riyîne, contints dë veûy tant dès rëv’nës.
[ 8 ]
Sèptante-cénq-ans ! Vîve Basse Auve ! C’è-st-on-âdje
Qu’on-a l’ bouneûr, qu’on-a l’ drwèt dè mârquer.
N’èst-ç’ nén po ça qu’on-a co r’faît l’ voyâdje
Dë së bon cœûr ? On n’ pléve mau d’î manquer.
Mins ç’ qu’on sét bén, c’èst qu’ nosse chér séminaîre
Pa Notrè Dame a todë stî bènë :
Eureûs lès cias quë veûront l’ Centènaîre
On sowaîterot, s’on pôrot, d’î rëv’në.