Sèptante-cénq-ans ! Vîve Basse Auve ! C’è-st-on-âdje
Qu’on-a l’ bouneûr, qu’on-a l’ drwèt dè mârquer.
N’èst-ç’ nén po ça qu’on-a co r’faît l’ voyâdje
Dë së bon cœûr ? On n’ pléve mau d’î manquer.
Mins ç’ qu’on sét bén, c’èst qu’ nosse chér séminaîre
Pa Notrè Dame a todë stî bènë :
Eureûs lès cias quë veûront l’ Centènaîre
On sowaîterot, s’on pôrot, d’î rëv’në.
Chaque côp qu’ë n-a on-ètèremint
À paurt lë p’tét monde quë fréquente
Tos lès-ofëces ordënaîremint,
Tos lès-ôtes î vont po l’ofrande.
Chaque côp qu’ë n-a on-ètèremint
Après come dëvant n-a saquantes
Mins jamaîs come au vraî momint
Qu’on stofe en-alant à l’ofrande.
Chaque côp qu’ë n-a on-ètèremint
C’èst nén l’ souvenîr dè l’ mwârt qu’ë l’ante
Dès djins qu’ n’î pinsenët pës seûlemint
I faut bén s’ mostrer à l’ofrande.
Chaque côp qu’ë n-a on-ètèremint
Lë trëstèsse n’èst wêre aparente
C’èst d’dja bia, quéquefîye on toûrmint
S’on-èva sins rîre à l’ofrande.
Chaque côp qu’ë n-a on-ètèremint
On-î r’trove pâr chance one chalande
On d’mande à s’ docteûr on traîtemint
On cause dë tot dè l’ timps d’ l’ofrande.
Chaque côp qu’ë n-a on-ètèremint
Dj’a pëtié dè l’ mëne arogante
De saquants fwatès tièsses …ô mins
Ça n’ bauje nén l’ platène à l’ofrande.
Chaque côp qu’ë n-a on-ètèremint
D’au cabarèt qu’èst l’ sâle d’atente
Waîtiz sôrtë on rédjimint
n-a pus nuk après l’ofrande.
