Tot çoula e-n on vraiy live di papî ki vos ploz awè po 15 uroliårds al livreye Antigone a Djiblou. Ci n’ est nén s’ mete foû manoye, dai ! Ci ptit espwet la d’ vindince, c’ est deus waloneus ki vnèt d’ l’ adiercî : Djozé et Maujeni.
Si vos n’ kinoxhoz nén les vraiys nos do scrijheu et do dessineu, sol cou-coviete, gn a les adresses di leu pådje sol Wikipedia walon (Maujeni eyet Djozé). — Ene bele pitite ricnoxhance po l’ ovraedje d’ ene pougneye di coraedjeus ki rapontièt, djoû après djoû ciste eciclopedeye la, li pus grande schôtlêye å monde di prôze nén racontrece e walon. (On n’ a ki l’ bén k’ on s’ fwait). —
C’ est çou k’ on a l’ droet di si dmander po nosse Djåke (motoit l’ Jaki des paskeyes), ki vént a schipe di nos ofri on cråne roman poliçrece, « L’ Adjint Mwasse » (2019).
Li response est kécfeye dins ene des noveles, la ki li scrijheu raconte k’ i s’ dispiete tos les djoûs a cénk eures å matén, et s’ mete divant si éndjole a taploter çou k’ il a sondjî del nute. Sondjî-råvler come les paskeyes avou s’ viye mame (ene pådje : Li sondje, p. 38), ou l’ cene avou si evoyaedje po ls Amerikins å Yemen (Oufti, p. 75-80). Ou sondjî-rpinser, come li banslêye d’ ôtès noveles, la ki li scrijheu s’ î rmimbere des etrevéns di s’ vicåreye. Et l’ dire platezak dins l’ adrovaedje : « Tot çki vs alez lére dins les pådjes ki shuvnut, dji vs pou waeranti k’ dj’ els a veyou, etindou, et pacô viké, dins nosse Waloneye d’ ådjourdu. »
Vola ddja çou ki nos candje ene miete di beacôp di scrijhaedjes e walon. Come dijheut Stéphane Evrard, li mwaisse persounaedje di nosse « Batreye des cwate vints » (2006) : « Dj’ a léjhou ene bansléye di prôzes e walon, et del powezeye eto. C’ est nozé ki l’ diåle. Ça a djusse on fayé ptit difåt. Ça s’ passe todi dins on ptit viyaedje del Walonreye, etur 1900 eyet 1960, ey emon des ptitès djins. Sovint, gn a onk ki mourt al fén do conte. »
Gn a co åk : dins tos les romans classikes do walon, les manaedjes sont todi bén d’ asgur, avou l’ feme ki shût si ome, k’ elle a maryî d’ amour. Et les efants esse todi bén aclevés. « Paski, fåt dire li vraiy ou çk’ il est, nos scrijhaedjes e walon ont stî lontins rimplis fok di bråvès djins, ki vont a messe, a vepes et å salut. » (Vera, nost ôte roman, 2011).
Mondiu todi ! Kéne diferince avou les copes k’ on discrît vaici. Ki n’ si comprindèt nén, et viker tchaeke di s’ costé (Disbåtchance, p. 83). Ki c’ est l’ båshele ki foircixh li valet (Li vî galant da Cristele, p. 90). Ki c’ est l’ feme ki lait l’ ome — trop påjhûle et nén ardant assez — avou les efants, et aler lodjî a l’ otel, pu fé les manaedjes po wangnî s’ crosse, pu rivni hontieuzmint dimander pardon ; si fé rçure avou ene ratournêye, et s’ aler plinde divant les noerès cotes come feme k’ on bouxhe dissur leye (Candjî d’ cassene p. 57). Et hay vos nd åroz ! Did la li sortite do live : « A n’ nén mete dins totes les mwins »
Di tenawete, ci n’ est nén vormint ene novele, mins purade on biyet d’ oumeur. Come cwand li scrijheu plind si fré, li singlé d’ Årdene, k’ on-z a resseré dins les bwès di cåze del minêye di pesse afrikinne (A m' fré singlé, pourcea d' Årdene p. 31). Udon cwand i rescontere ene vatche et taper ene divize avou leye, et s’ abaiti ki po ene biesse, ele n’ est nén si biesse ki ça (Li grosse vatche, p. 67).
Come dedja dins l’ « Adjint Mwasse », li scrijheu n’ a nén sogne di stitchî des ratourneures ricalkêyes do francès corant del Walonreye, come « peter on cåbe » (divni sot) p. 79, « putin ! » u biesmint « picniker » (p. 89).
Portant, pacô, i vos va rcweri des rålès disfondowes come « èvou » (avou), co siervowe asteure do costé d’ Gobtindje, u « ayincî », li djiblotwès po « ahessî » (p. 89).
C’ est l’ dierin boket do live. On sinnario foirt simpe. Les « Dålon », c’ est cwate fis des Walons ebagués e l’ Amerike ki sont rivnous « d’ å lon » po s’ rastaler e l’ Walonreye. Et divni des hapeus d’ boûsse, sotnous pa leu viye mame. Tot rexhant del gayole, il amontnut on kidnapigne… ki toûne a cou d’ poyon.
Les persounaedjes sont des vraiys waloneus. Les cis et cenes k’ ont stî la croxhîs på spiroutî Djozé si divrént ricnoxhe sins må d’ tiesse.
Sicrît li 28 di nôvimbe 2020, ricandjî ene miete po mete des hårdêyes eviè l' eciclopedeye et viè des bokets do live dedja cial so Wikisourd (li live est eplaidî dizo licince CC-BY-SA 4.0).