Novèles èt Binde à dèsséns/IV
Ciste ouve ci egzistêye eto divins ds ôtès ortografeyes : Rifondou walon.
IV
À m’ fré singler, poûrcia d’Ârdènes
C’è-st-avou vos qui dj’ vou causer. À vosse consyince, po p’lu diskèrdjî l’ méne. À voste onètrèté. À vosse rèspon’sabilitè…
Dji sé bén qu’ ça n’ vos va nén bén, qui c’èst co sur vos qu’on a foutu l’ dosséye… Vos l’ savoz bén don ! Dîjoz l’ franchemint… Siya ! Faut nén awè peû… Vos vèyoz quand minme bén qu’ vos n’ tricotoz pus qu’avou one awîye ; qu’asteûre, vos n’ èstoz pus prusintauve…
C’èst po ça qu’i vos faut rèssèrer è vosse maujone.
Siya !... Siya !... C’èst bén come ça. Vos n’èstoz pus di stok po p’lu courû à rauwe… Po socener avou lès fumèles, po pwârter vos boûsses à maule.
Vos n’aloz quand minme nén, - avou vosse kèdje - aler cougnî, Vos comachîz po fé dès djon.nes ! Vos n’ duvriz nén fé ça …
Adon, nos-ôtes, come nos l’ savans bén à l’ avance. Come nos nos fyans mau d’ vos, nos savans qu’ c’est deur por vos di n’ pus polu moussî foû d’ vos waibes, nos avans dècidé di vos d’ner on côp d’ mwin…
Waîte on pau quéne bèle cloture « ursus » qu’on vos-a èmantchî. C’è-st-one bistoke, siya, siya, on vos l’ done. Avou dès fis d’arca qui r’lujenut au solia quand i lume.
One cloteure qui nos-a costé l’ pia d’ nos fèsses. Èle ni tint nén fwârt li bruwèt. Mins èlle a stî mètouwe là po qui v’ sondjoche à aurder vosse pia. Èt n’ nén passer oute, po-z-aler carèssî do costé dèl France.
Oyî, m’ soçon, c’èst malaujîye à-z-avaler, mins c’èst come ça ! C’èst l’ minme ârgèdène qu’on-z-a tchanté aus soûdârs dèl guêre di quatôze su l’ bwârd di l’ Ysêr. Lès brâves soûdârs, ètêrés dins leûs tranchéyes qui d’vîn’ arin.ner lès Boches to l’zî tchantant « Halte là, on n’ passe pas ! »
Adon, i faurè bén yèsse djintî, vos nos mosteur’roz qui v’s-avoz bén comprins ç’ qu’on v’s-a dit, qui v’s-avoz bén saîsî lès sonètes qu’on v’s-a d’né à ètinde. Qui l’ cloteure à picots r’lut, tot jusse come lès bayonètes dès soûdârs qui aurdîn’ l’Ysêr ; èt… èt, qui v’s-aloz d’meurer pa padrî… paujèremint !
Cor on côp, vos-avoz bén comprins ; non nos plans taper dins lès mwins po bén mârquer l’ mârtchî ?
Bon, pusqui, c’è-st-insi, singlé qu’al pèsse, dji v’ dî mèrci branmint dès côps ; nos n’ irans nén conte nos vîyès-ûsances. Ci qui dj’ vos sowaîte li d’ pus : pwârtoz vos bén, èt dji pâyerè l’ médecén…
Èt … Èt…
Oyî, vos sèriz co bén dins l’ bon : po ç’ qu’ènnè d’ vosse santé, nos laîrans tchaîr ça…
C’èst mia insi !
Note Wikisourd
Dandjreus scrît tins del minêye di pesse des pourceas d' Afrike e l' Gåme (2018-2019). Li clôzeure k' on cåze, c' est ene k' a stî metowe inte France et Beldjike.