Les molins à chwaches
— Vinau, Firmin; dju t'ai amon.né en-ome d'après An.nevôye, inte Dinant èt Nameur. C'è-st-in p'tit viadje û ç' qu'i gn-avot brâmint dès molins. Yink du-d-zês, ç'astot in molin à chwache, douwau Lucyin?
— Ayi, savos. Divant do v'nu rèche è Moûse à Ruyon, nosse pitit richot, li Royinète, asteut vayant assez po d'nè fwace à one dozin.ne di rûwes dissu s' dérin kilomète di d'tchindèye. On p'leûve comptè one rûwe di fwadje di marchau, treûs po lès fornias èt lès fwadjes à fier, one po l' polichwè, treûs po dès molins à farène, one po l' brèssène, one por on stwardwè qu'on-î fiyot di l'ôte di fayême, one sôyerîye avou lès-ârmûres po soyè mârbe, one sôyerîye po r'cèpè lès plantches, èt one pus p'tite rûwe po l' buwèye èt lès-ayèsses do tchèstia. Et pîs nos-avins li fâmeûse rûwe po l' molin à chwaches.
- Dijèz, ô, non.nonke, dès chwaches, c'est dès scwâces ?
- Bin ây, va; à Nameur on dit des chwaches, èt ciddlé on dit dès scwâces, èt après Lidje on dit dès hwaces û, dès places qu'i gn-è, dès hwèces. I gn-è mwint' walons, maîs on s' duvrot tourtous bin comprinde, don.
— Ayi, don; ti vès, mi fi, c'èstèt po cobroyè lès scwaces di pèlozias èt fè rèche li tan po tanè lès pias. Lès rûwes avint tortotes leû bî po lèzî amwinè l' côp d'êwe po lès mète an route èt lès fè laukè an l' rissatchant.
- Jusse! I gn-è co ène soyerîye à Viance qu'alot come ça djusqu'à nawêre. Min.me co asteûre, lu mon.nî du Saurt mûd co toudi à l'êwe. C'est qu' ça n' cousse rin, là, valet, la fwâce du l' êwe. Dandjereûs qu'i gn-è d'vot awèr dès molins à scwâces avaurci ossi, va, maîs dju 'nn' aî jamaîs oyu causer. On lès loumot co bin pa dès côps lès scwârçaus, douwau?
- Dji pinse bin. C'est lès hwèrçaus, s'apinse qu'on dit èvè Lîdje. Lu tan, ç'astot l' mèyeû dès cayèts qui rèchint fû du molin. On l' voyot aus tanerîyes. Adon i gn-è d'mèrot co lès rèsses qui dudvunint du l' sucafiote du l' sucwâce. Pace qu'i faut bin sondjer qu'in molin à scwâces, c'èst come in molin d' mon.nî û in stwârdoû. Du molin à farène, i gn-è rèche d'in costé la mon.nêye èt d'èn-ôte dès costés dès rèsses quu c'èst lès latons èt lès rabulèts. Dins in stwârdoû, c'èst parèy: on tire l'ôte, - quu ça sôye du lin, û dès fayines èt dès djayes dins timps - èt pîs après qu' lès grin.nes ont yu sté spoûjèyes du leû z-ôle, çu qui d'meûre, c'èst lès tortês qu'on put d'ner à mougner aux biêsses. Adon, lès rèsses du molin à scwâces on lès ramassot èt on lès mètot dins ène platine pou z-è fer dès hotchèts d' troufe.
- Qu'èst-ç quu c'èst, dès hotchèts d' troufe ?
- C'èst conne dès p'tites briquètes du troufe.
- Ç'astot du l' troufe come on-alot z-è quê dins lès prés èt lès fagnes d'avaurci ?
- Non.nè, hin, çu troufe-là, dj'è causerans èn-ôte djoûr. Çut'-cile on la loumot troufe pace qu'on la brûlot ossi, èt qu'èlle sintot in pô come la troufe dès trouferîes. Lès-ovrîs qui f'jint lès mitchots d' troufe, on lès loumot dès troufleûs. Ç'astot brâmint après Stavelot qu'on f'jot ç' mustî-là.
- Et dins lès tanerîyes, qu'èst-ç' qu'is buzikint avu l' tan?
- I m' san.ne quu dj'ans d'djà bin assez copiné pou ènut′, là, mi. Si dj' lèyins nosse soçon d'An.nevôye 'nn' aler coûtcher, ca v's-astèz hodé, dandjereûs, après in voyadje parèy? Et dj'îrans dwârmu ossi, nous-ôtes. Qu'è dis′, Firmin?
Les bokets d' tecses dits på soçon d' Annvoye ont stî scrît pa Lucien Léonard esprès po mete dins l' live.