Lès pêcelîs
Firmin mousse à l' maujon a courant èt i dit, t'a tanflant
- Bonswâr, non.nonke Colas. Vous m'avîz promis d'èspliquer pou l'ovradje dès pêcelîs, ènut'. Nu rovièz nin, là!
- Alê, alê, doûcemint d'ssu lès grand-routes! I gn-è pont d'avance du chaurer, don, surtout dès solés qui chalbotèt. Vinau ène miète vêci, tins, quu dju t' ramantche lès lacètes èt tu r'mète la papelote d'aksion. Tu s'rès d'djà in pô mî a.èssé. C'èst toudi malèreûs d'ènn' aler acayeté insi pattavau lès vôyes… Mon Diu toudi! bin ça n' m'ètone nin qu'is chalbotèt : on put t'taleûre passer deûs dègts atur du talon èt solé. Tu lès-ès tchwâsi trop grands, don, m' fi.
- Nèni, non.nonke; dju lès-aî tchwâsi avu moman, èt l' martchand è dit qu'i falot prinde ène grandeûr qu'on plot stiker in dègt padri.
- Ayi maîs non pus, is s'auront co afroyé in pô, èt vou-lès-là trop grands, wê, asteûre. Çu n'èst rin; come ça, is s'ront jusse pou l'anêye qui vint, quand t' pîd aurè créchu. (…) Wès' bin cès solés-là, don, èt bin, c'èst du prèmî cûr, là, ça; comme lu cé qu'on fjot dins lès tanerîyes du-d-dins timps.
- Dju n' vus nin z-èsse hodaule, non.nonke, maîs nu m' fijèz quand' min.me nin trop langui avu l'ovradje dès taneûs.
- C'èst qu' ç'astot in laîd niche mustî, va, lu tanadje; èt lès pêcelîs is vikint souvint ou rastrindu. Lès tanerîyes astint quausu toudi mètûyes lu long d'in gros bî, ca èlles avint toudi dandjî du clére èt nète êwe. Tins, c'è-st-à Djivèt qu'i gn-è n-avot ène cachounêye. Et t'avos dès djins quu l'diâle d'après Vènecîmont, Mauvejin, Von.nèche èt avaurlà qu'î alint travayer tous lès djoûs. I gn-avot ène culêye du Djivèt quu ç' n'astot qu' tanerîyes, toutes sutramêyes lu long d' l'êwe du Houye. Note bin qu'i gn-è n'avot yène à Sint Yubêrt ossi, dins timps, qui r'foutot toutes sès nichtés dins la Lome. C'èst moutè pou ça quu, du ç' timps-là, l'êwe du Lome, on la loumot la Nwâre Ewe. Qué flaîreûr, valèt, lauvau. Ç'astot aujî à comprinde, don. Lès pês arivint co avu dès bokèts d' poûrîye tchaure qui pindint après. Adon, les ovrîs duvint c'mècer pa splitcher cès ramechions-là fû dès pês. Après ça, i lès falot pèler. On lès lèyot dustrimper dins dès batch avu dul tchaus èt dul soude pou lès poy s'atinri. Çu côp-là, i falot scrèper lès poy vôye avu in p'tit râcloû. I astot d' quèstion du r'nètier la pê come on r'chère èn-ôbus, sés'.
- Ç'astot pou ça qu'on mètot du tan d'ssus, dandjereûs ?
- Bin laîs-m' dîre, là. Â vèraut du p'tit tanis′ quu tu m' fwais si mau dîre. C'èst seûlemint asteûre qu'on mètot les pês à taner. Dins ène tanerîe, t'avos toudi ène pèklêye du batch. C'èst là-d'dins quu l' tan qui v'not dès molins à scwâces, avot sté dusmantché dins dul nète êwe. Après quéques djoûs, l'êwe duv'not toute brune; èt si tu l'auros yu mètu su l' dubout du l' lingue, t'auros sintu come in p'tit gout d' sèr. Et si t'auros trimpé in bokèt d' tchaure dins ç' machot-là, i s'aurot yu ratchitché èt s' duv'nu dèr come dul cwan.ne. I n' plot pus mau d' tchamousser, sés', après ç' toûrnêye-là; tu l' p'los aurder ta vîye dèrante si t'auros volu… Qu'èst-ç' quu-dj' dijos d'djà don, mi? Âwây… Adon, nôs pêcelîs stindint lès pês dins lès batch avu l'êwe du tan, qu'il î avint ossi dusmantché ène ôte poûre pou d'ner la couleûr. On lès lèyot trimper dès côps jusqu'à trwâs mwès. Su ç' timps-là, èles toûrnint à cûr, èt du prèmî, dandjereûs. Ç'astot ça, là, l' tanadje. C'èst pou ça qu'on dit quu quéqu'in è-st-in tanant û in tanis′ — come dju t' traîtos t'taleûre — pace qu'il èst tèlmint soyant qu'i v's-adèrirot l'umeûr come lès scwâces kubroyêyes adèrichèt l' cûr.
- Èt pouqwè qu'on n' va pus pèler aus tchènês asteûre, d'abôrd qu'on fwait co toudi dès bons solés èt toutes sôrtes du bês cayèts d' cûr ?
- Jusse ! Wès' bin, don, on n'î è pus wêre suté après la guêre. Pace qu'asteûre, lès tanerîes n'ont pus wêre dandjî d' tan. Brâmint dès cûrs su tanèt aus prodwits chimiques. Il ont trovu in sé d' craume qu'i parait qui fwait toûrner lès pês a cûr dussu nin d'djà ène djoûrnêye; pou lès tènes pês, anfin, come lès cés d' bèdot, du gade û d' chèvreû. Pou lès cés d' vatche û du tch'vau d' traît, qui sont brâmint pus spèsses, don, zèles, i faut co toudi trwâs û qu' c'èst quate djoûs. Et c'èst qu' insi, c'èst brâmint du timps du spaurnié; èt timps cousse tchîr, là, asteûre.