On må qui féve sètchi d’èreûr,
on må qui l’ diâle li pus grand èt l’ pus neûr
è fond d’ l’infiér a-t-invanté,
on må qu’on tronle rin qu’ d’ î pinser,
mågré saint Rok èt sainte Djèn’vîre,
on må qu’on n’ deût måy ènnè rîre
di sogne di l’atraper
si l’ cloke di Rome vinéve à soner,
li Pèsse, anfin, li pus grand d’ tos lès mås,
on bê djoû s’ vora sos lès bièsses.
Lum’çon, halène, foyon, soris, rat èt qwate-pèces,
ågne èt chamau, boûf, vatche èt dj’vå,
ours, mårticot, tchin, leûp èt r’nå
morît turtos come dès mohes.
Pus nin on råskinioû so ’ne cohe
po tchanter hyou, hyah, ri, tchi tchi tchi tchi,
pus nou pîsson po s’ bate à s’ fé cwinksî,
pus nou diâle di mohon-voleûr
po fé assoti l’ payîsan ;
lès peûs sûrdît à l’advinant
èt lès frumints promètît bone aweûr
sins qu’on-z-avahe, ciste annêye-là,
mèsåhe di poûre nè di spaw’ta.
Lès pauvès bièsses longue-sitindowes
ratindît leû dièrain moumint
sins r’mouwer tièsse, orèyes, djambes, pates ni cowe.
Fwért pô fèrît leû tèstamint :
nouk n’aveût d’ keûre di s’ fème ni d’ sès parints,
’nn’ aveût-i d’ keûre vormint !
On n’a wêre di keûre qui d’ lu-minme,
qwand c’èst qu’on veût qui l’ Mwért risinme
li grand coûtê qui barloke so sès reins.
Wikisourd:Mwaisse pådje/tecse/2
Samwinnes :
Lès bièsses ascûses dèl pèsse
« Les Animaux malades de la peste »
ratournaedje da Ch. Duvivier de Streel
Maurice Piron, La Vie Wallonne, t. 22, p. 117-224,
[ 1 ]
Lès bièsses ascûses dèl pèsse.
[…]