Moman a nuké s'grand céndré,
Addé li stûve, li tine est presse,
Nosse-t-homme atind po z'y-intrer
Et por li c'est-ène fameûse fiesse.
Faut vôy come i stind ses p'tits brès
Viè l'euwe oùs'qu'i broke si voltîye.
I faut qu'on s'dispétche bon-z-è rwèd
Quand c'est po l'bagnî qu'on l' disbîye.
Qué bia p'tit cwârps, l'èfant tot nu.
Quand on lî a r'tiré si tchmîje,
Sins minti, c'est li p'tit Jesus
Come on l'wè dins l'crèpe à l'èglîje.
Volla dins l'euwe, il est contint.
Si on lî léye fé à s' t'idéye,
I flache tant qu'i pout à deux mwins.
Tote li cûjène è n'n'è spitéye.
A fîye, il a l'air di dmander
Ç' qu'il a là au mitan di s'vinte.
I mosse si botroûle tot sbaré,
Et quand dj'lî dis qui dj'lî va prinde,
I s'boute à brére come in pierdu.
Faut qui dj'féye chènance di lî r'mète
Po l' fé taire, li p'tit lustucru,
Et l'ramwinrner à m' fé rizète.
Tote ène Vîye (CW1940)/XIII
13
Tote ène Vîye, Les Cahiers Wallons lº 32,
Twèlète