Dispû l'timps qu'i fait des ramadjes,
Dji m'rafîye d'ètinde nosse colau
Si mète sérieus'mint à daladje
Et dire ôte tchôse qui bhô-bhô-bhô.
Bhô-bhô-bhô ! Qwè-ce qui ça vout dîre ?
Tot çu qu'i pinse èt tot ç' qu'i r'sint :
Faut s' ratinde à tot, minme au pîre,
Quand i s'mèt à causer l'flamind.
Bhô-bhô-bhô ! - Dji m'sins tot binauje
Di fé aler mes djambes dins m' lé.
- Vinoz dé mi, qui dj' satche à mi-auje
Li moustatche qui vos fait si laid.
Bh-ôbhô bhô ! Gna qui l'ton qui candje…
- Rindoz'm mi tute ! Et pus rwèd qu' ça !
- Dji sos frèche ! dji vous qu'on m' discandje !
- Vos n'advinez nén qu'c'est swè qu'dj'a !
Eh bén, pusqu'i s'fait bén ètinde
Gna t-i dandjî d'yesse si pressé ?
Poqwè fé transi èt ratinde
Qui li p'tit s'mète … à mau d'viser ?
Poqwè n'savan-nes djouwi dèl vîye,
Sins n'z-astaurdjî aux bons momints ?
On s'compudrè mwins' bén quéntfîye
Quand i s'espliquerè al drwète mwin.
I n' faut qu'in mot, i n' faut qu' ène djèsse
Po mau s'comprinde èt s'ènonder.
C'est rade dit ène parole qui blesse,
In cœûr d'èfant, c'est rade sèré.
Nos estans bien des droles d'apôtes !
Nosse blé n'est nén sitôt lèvé
Qu'nos vôrénnes dèdjà coude les pôtes,
Et nos n'fautch'rans p'tète qui do s'né.
Tote ène Vîye (CW1940)/XII
12
Tote ène Vîye, Les Cahiers Wallons lº 32,
Ramadjes