Li vint d'ivièr cheût les volèts
Et tchesse li ploufe à gros paquèts;
C'est l'momint d'fé ène boune blaméye
Po chîjeler asto l' tchiminéye.
Abîye mi fauteuil o culo,
Mi pupe … a-dje do toubak dins m'pot ?
Ah! l'boune swèrèye po les sondjerîyes !
Li moman, lèye, a r'pris st-èwîye,
Ele rovîyréve minme qu'elle a fwin
Quand èle travaye po nosse gamin.
Do timps qu'elle keûd ses p'tits cwârsadjes,
Li bokè d'homme est-st-à l'ovradje,
C'est minme li qui s'done li pus d'mau :
I vout rauyî l' queuwe di si tchfau.
Dj' a si bon d'vôye mi p'tite canaye
Qui tot djouwant avou s'cacaye,
Blèfe et ramadje come in pénson.
A m'lîve dji n'fais pus atincion ;
Li tauvia qui m' espétche di lîre
Est bén pus bia qu'tot ç'qu'on pout scrîre.
La qu'i léye si biesse sus l' costé.
Parole, i saye di s'sitamper !
Hardi m' colau, allons coradje !
Do côp l'moman quite si t-ovradje
Po vôye si li p'tit è rècherè,
Ou combén d'côps qu'i s-sitaurerè …
Vol'là à gn-gnos, pwis à quate pates,
Mins à l'tère i r'tchait co pus rade,
Sins awè l'air d'è yesse saisi,
Ça l'fait rîre ! Et nos ôtes ossi.
I gna qui l'prèmî pas qui cosse;
I s'y r'boute dèdja li p'tit losse !
Là !... à quate pates … i r'lève ène mwin,
I tanfèle, i blèfe... i ratind …
Was'rèt-i jamais lèver l'ôte ?
Bravo ! Là travayî à m'môde !
D'in bon côp d'rein i s'a r'drèssî,
Mins asteûre i n'wase pus boudjî;
I s'dimande si s'va lèyî r'tchére,
Si visadje candje, ouche, i va brére !
Mins tot d'sûte lès brès del moman
Ont stî presses à rascoude l'èfant
Qu'èle èlève jusqu'au d'zeû di s'tiesse.
A l'sitofér, elle li rabresse.
Mins li, i n'dimande qu'a r'sayî;
A pwinne à l'tère, i s'a r'dressî
Et tronnant su ses p'titès djambes
I risquéye trwès quate pas dins l'tchambe,
Po v'nu r'tchére dins mes brès stindus.
Hardi m' colau ! Les éles crèchenut !
Tote ène Vîye (CW1940)/XIV
14
Tote ène Vîye, Les Cahiers Wallons lº 32,
Les éles crèchenut