Lèye, qui dins saqwants mwès va yesse ène djonne Moman
Fignole léndje et dintèles po l'bêrce di nosse-t-èfant
Et dji pous, rén qu'à vôy li doûceûr di ses djesses
Mèsurer tote li paurt qu'il a ddja di s'tindresse.
Mi, dji n 'sins nén co m'cœûr si mète à bate pus rwèd
Quand dji sondge à l'èfant qui dj'térais dins mes brès;
Dji m'dimande minme sovint, sins è rén wasu dîre,
Si les ôtes mi r'chènenut ou si c'est mi qu'est pîre.
Non, m'cœûr n'estait nén sètch, grâce à Dieu. Djel comprinds
Dispû qu' dj' a t'nu dins l'mène li fosseléye pitite mwin
Da Djan, qu'est là dins s'bêrce, si paujère et si fwèbe
Qui dji m'sins malèreûs quand dj'pinse à tos les r'cèpes
Qui l'vîye ni manqu'rè nén d'ataper padvant li.
Si dj' a taûrdjî ène miète, dji m'ratrape ci côp ci:
O Djan, mi p'tit gamin ! sûr qui dj' vos wès voltîye !
Compudrôz minme jamais tot l'prix qu'vos d'nez à m'vîye ?
L'heûre qui passe est si belle por nos
Qui d j' vôréve dîre mêrci à gngnos
A l'cène qui m'a d'né tant del djôye.
Mwinnadjes sins bêrce, ah! vinoz vôye …
Nos nos r'wètans amitieûs'mint,
Spale conte sipale, li mwin dins l'mwin,
In seûl cœûr comme ène seûle pinséye,
Cléncîs dzeûs l'bèrce di nosse bèdéye.