Dins l'air fine bleuw do matén d'méye,
Les érdiès des pièles di roséye
Tronnenut sus les-ièbes do pachi
Et sus les ârbes, tot blanc floris.
A l'èglîje sone ène pitite cloke,
Dins l'clotchî, djèl wè qui bârloke,
Comme si elle dansait d'contintemint,
D'sinte li solia, d'vôy li bon timps.
Et vos, dispétchîz vos Madlinne !
Dj'a promètu d' fé ène noûvinne
Si vos n'manquîz nén l'rendez-vous !
Yène ? Et minme deux… et co avou.
Wez! Po m'fwârcî à prinde pacyince
Dji saye di mète tote mi sciyince
A chwârchî in cœûr dins l'pomî,
Et vos, c'est l'ménk qui vos chwârchîz.
Enfén volci, s'tiesse sus mi spale.
Mi bouche riftéye si roudje massale
En d'djant tot bas des mots brûlants,
Tofère les minmes dispû Adam.
Dizos l'cwârsadje di fine dintèle,
Dji sins tocter l'cœûr del bauchèle,
Elle clénce si tiesse doûcemint, doûcemint,
Elle sère les oûys, si lèpe si tind…
Li flauw solia d'ène belle viespréye
Si va coûtchî drî ène nûléye;
Li tène fumêre d'in feû d'tirans
Monte, bleuwe et drwète lauvau dins l'tchamp.
Li cloke sone doûcemint à l'èglîje,
Come si elle avait peû, al chîje,
Di fé trop d'brût et d'rèwèyî
Les soverdias qu'sont dins l' clotchî.
L'eûre est si trisse èt si paujère,
Qu'on l'vôréve vôy durer tofère,
Po bêrcer l'pwinne, po l'èdwârmu.
- Madlinne ! Madlinne, ni r'vérôz pus ?
Ah! qwèce qui c'est qui dj'véns d'ètinde ?
Non. Personne n'arive dins l'pîcinte.
Sus l'buc twârdu do vî pomî,
Pau-z-è mossès, l'cœur est mougnî.
Tote ène Vîye (CW1940)/X
10
Tote ène Vîye, Les Cahiers Wallons lº 32,
Dins l' pachi