Ele est-au bôrd del vôye, et les meurs sont fén blancs.
Ene tote pitite tchapèle a stî faite au mitan,
Gna in vî Bon Diè d'keûve padrî les caraus djanes,
Les volets sont gris-bleuw, li twèt est d'roudjès panes.
I gna in grand rosî qui rascouve tot l'pègnon -
Vos n'vièroz nén l'parèye dins l'viladje, à l'saison -
Et les rôses qui pind'nut dzeûs l'uche et les fèniesses,
Donenut à m'vîye maujone l'air d'esse todis à l'fiesse.
Mi Parén vént s'achîte sus l'banc quand i fait bon,
Et i d'meûre là des eûres, aspouyî sus s'baston,
Fumant s'pupe au solia, au solia qui restchaufe,
Li mèyeû camarâde des vîs hommes et des paufes.
C'est dins ç'vîye maujone là, quand dj'estais tot gamin,
Qui dj'a tofère passé les mèyeûs d'mes momints.
O les sinas pleins d'foûr, les gûrnis pleins d'vîyerîyes,
Oû-ce qu'on discouve totes sôrtes padzos les aragnerîyes !
Oh quén plaiji qu'c'estait, d'broker dins l'pidjonî,
Quand on n'vlait pus djouwer, où bén qu'on s'vlait catchî.
Come c'estait amusant d'wétî pa l'barbakène,
Les maujones, les djârdéns, l'ôr des moncias d'ancène.
Mins quand l'vièspréye tchèyait, qu'i kminçait à fé nwâr,
Dji n'wasès pu d'mèrer, et maugré qui dj'fyais l'fwârt,
Dji n'estais nén à mi-auje po dischinde al valéye !
On pout rèscontrer d'tot dins des nwârès montéyes !
Quand dj'estais bén nauji d'awè couru tot l'djoû,
Mi Parén, al swèréye, mi fiait achîte sus s'choû,
Et m'racontait des fauves di macrales et d'sôrcîres.
L'homme aus poussêres passait, dji broyais mes paupîres,
Adon, moman m'pwârtait dins l'grande tchambe à deux léts.
Ene tote pitite vèlieuse - gnavait qu'ça po lumer,
Fiait danser totes sôrtes d'ombes qui purdénn't des visadjes
Si laids et si man'çants qu'i fallait qui dj'm'è catche !
Dispû … l'timps a couru. Il a rèlé sus m'twèt,
Li maujone s'a vûdî p'tit-z-à ptit et les crwès
Dzeû mes mwârts s'alignenut dins l'paujère cimintiére
Eou qui dj'vas priyî, mi rapinser et brére.
Li tite estant e grandès letes, nos avans rmetou « vîye » avou l' sicrijhaedje come dins l' tite.