Qué bouneûr qui c'estait d'èraler au viladje !
Lontimps d'vant les vacances dji m'è rafiyais d'dja.
Hein! Aller r'vôy Parén, li vî tchén et nosse vatche,
Li maujone aux blancs meurs, li forni et l'sina !
« Li forni », dis-dje tot bas, sus l'minme ton qu'ène pâtère.
Dji r'wès Mârine, après l'cûj'néye, qui douve li for;
Mi nez r'crole à l'odeûr del taute qu'on met al terre,
Rafrèdi sus do strin qui l'suc di pot daubore.
Tot m' fièstéye quand dj'rarive : C'est l'crèkion dins l'uréye,
C'est l'homme qui dj'rèscontère, qui m'crîye gaimint « Ah m'fi ! »
C'est li nwâr tchèrbonadje avou s'grande tchiminéye,
Qui chène in vî soçon qu 'on rwèt avou plaiji,
C'est les bouchons d'sucètes auddilon del pîcinte,
C'est l'alouette qui tchante, et dzos l'pont, l'clair richot
Qui m'dit tos bas « Dji pierdais pacyince à t'ratinde !
C'est tot qui r'chandit m'cœur, del gâre jusqu'à l'maujo !
Poqwè faut-i qu'i gn'eûche des r'toûrs causes di tant d'pwinnes
Addé l'lé d'in malade qu'on vout r'vôy cor in côp ?
Adon, li route chène longue, li song djale dins les winnes,
On s'dit, dj'a tant riv'nu et c'èstait co trop pau.
Mes djins ! N'trouvez jamais qui l'bouneûr padrî l'uche,
Jamais pont d'volets clôs ni d'vacha qui fait peû !
Qu'au payis, vos parints tofère vos ratindenuche
Avon des bounès baujes et des visadjes heureux.
Tote ène Vîye (CW1940)/II
Les r'toûrs