Rassonraedje des tchapeles di Mélin

Èn årtike di Wikisource.
Rassonraedje des tchapeles di Mélin
Li Rantoele,  95,

Savoz bén çki c’ est d’ on « tchapea » ? Nén çou k’ on a so s’ tiesse. C’ est l’ fond d’ rôlmint d’ ene fabrike d’ eglijhe, la k’ arivèt les louwaedjes des teres di fabrike.

Po poujhî dins ç’ tchapea la, i fåt esse li cwårlî del fabrike, ki c’ est, å pus sovint, li curé.

Riprinde li tchapea ?

Avou l’ manke di curés el Walonreye, les noveas priyesses ki vnèt d’ ådfoû ont cobén l’ idêye di prinde les çanses do tchapea po-z evoyî po des bounès ouves dins leu payis. Oyi, mins nonna ! Adon k’ i gn a toplin des tchapeles ki toumèt e-n ene blesse vaici, dins l’ viyaedje.

Li prumire a-z esse rassonrêye, c’ esteut li Sinte-Mareye-Madlinne di Gobtindje. C’ est on vî vî bastimint, k’ on è cåze pol prumî côp e 1441. Mins elle a co stî basteye divant çoula, dandjreus.

C’ est nosse Laura k’ esteut mwaisse do tchantî. C’ est l’ veur k’ elle esteut la tos les djoûs po trover des volontaires et fé les ekipes.

Et cwand on a yeu tot fwait, on l’ a strimé, et dj’ a scrît ci ptit arimé la

C’ est adon ki Michel Desmet, a yeu l’ idêye d’ askepyî ene soce « Les Amisses des tchapeles » po s’ poleur siervi do tchapea po rassonrer les ôtès tchapeles di Mélin.

Les fabrikes d’ eglijhe

Dimandeu : - Ça fwait k’ ene fabrike d'eglijhe a des teres k’ ele lowe. Mins kimint k’ ça va po tchoezi l’ louweu ?

Michel Desmet (M.D.) - Cwand i gn a ene tere a rmete, dji va dire ki li cinsî arestêye, et k’ on l’ doet rmete a èn ôte cinsî, gn a ene lwè e l’ fabrike d’ eglijhe, come cwè ki c’ est l’ cinsî li pus minåbe k’ a l’ droet l’ prumî po rprinde li tere. Li ci k’ a l’ moens di rivnous, ubén li ci k’ a l’ pus di djonnes efants a ses coirdeles. C’ est li lwè.

Dm. - Et k’ est aplikêye ? Metans s’ i gn a on tchamp d’ fabrike k’ est metou e fén mitan do labeur d’ on seu cinsî ?

Jules Tits (J.T.) - Avou certinnès råjhons. Pask’ i gn a ene sôre : si vos avoz li pus d’ efants et li moens di rivnous diclårés, ça n’ vout nén dire ki vos n’ estoz nén l’ pus ritche del comene. Gn aveut des ptits etourpinaedjes ki nos î avans metou ahote.

M.D. - Mins ci n’ est nén çoula ki rapoite li pus. So cwénze ans ki dj’ a stî cwårlî al fabrike d'eglijhe, gn a troes teres k’ ont stî a rmete. Ey eco ! Des bokets di 60, 70 åres. Adon, ça n’ våt nén les poennes do-z è cåzer.

Dm. - Adon vos avoz dvou mete so pî des fiesses po ramasser des cwårs.

J.T. - Oyi. Li prumire, ça a stî vaici a Gobtindje, po les 25 ans do rassonraedje del tchapele.

Ene miete d’ istwere

Dinltins, gn aveut on vicaire pol tchapele di Gobtindje, et por lu viker, il aveut les rivnous del tchapele. Les colekes, les etermints. Mins i fijheut eto l’ cinsî. Les bastimints ki sont e restoråcion asteure al cinse dilé l’ bwès d’ Wayindje, c’ esteut li ståve des tchvås et li ståve des pourceas d’ on curé.

Mins eto: li tchapele esteut prôpietaire di teres, k’ ont rivnou al fabrike d’ eglijhe après l’ revolucion francesse. E 1795, les Francès on saizi tos les béns des eglijhes.

Mins avou l’ Concordat (acoird da Napoleyon avou l’ Påpe), les fabrikes d’ eglijhe ont rçû tos les béns k’ avént stî dnés po-z aidî les målureus et les malådes. Pus tård, ces béns-fonds la ont siervu come båze des CPAS et des CAP. Ey adon, les ôtes béns, k’ estént rlidjeus, ont dmoré ås fabrikes d’ eglijhe.

Ki : les fabrikes d’ eglijhe s’ ocupént co des scoles et des ouves sociåles



Notes Wikisourd

Saetchî d’ ene resconte avou Jules Tits (mwaisse raconteu), Michel & Jacques Desmet et Laura Decossaux, li 13 di djulete 2020.

Tecses sol minme tinme, avou (u do) minme waloneu: