Nos, lès skèpyîs, nés-natëfs dë Mélin, cinsîs, skèrpës ovrîs, vîs à l’ pincion, tën’nët à vos dîre come nos l’ pinsans : on fèl mèrcë po avë faît conèche nosse vëladje èt l’ fé vëker dins lès-ouys dès maus-dëscoch’tés.
Fwärt dë nos spots, nos vourîn’ bén rèfwârci vos pôvès conèchances dëssë nos-abëtëdes da l’ campagne, quë vos nos v’loz mostrer èvou vosse tièsse è l’aîr, come dès cochets quë passenèt l’aîwe, sins rawaîtî l’ pârfond d’ nos djins.
Nos-avans conë l’èlèctrëcëté è 1938. Lès pavès d’ nos vôyes ont stî rarindjî è macadam dins lès anéyes 1980, po fé plaijë aus djins dè l’ vële qu’avîn’ ausse di noste airadje (sins flates èt sins bëgau), èt ça maugré l’volonté dès djins d’ nos-amias.
Ë n’ vos faut ni acrwêre quë nos-ènn’avans aus fièsses quë v’ voloz mètes së pîds, èle në fëjenèt quë contënouwer ç’ quë nos-avans todë faît. Lë fièsses dë Gobtindje dëréve quénze djoûs, ë-n-avot d’dja one guénguète po danser devant quë l’ Marc drove së salle. Dès djës d’ vëladje, dès coûsses à vélo, sins rovîs lès match’ dë fotbal à Mélin, l’autocros’ èt lès tërs aus colons au Maujone dès Bwès. Nos-avans minme conë on Corso è 1975 èt dëspôy dëpës d’véngt ans lès Saûnis mètenèt d’ssë pîds leû fièsse au vén d’ sètimbe, dè timps qu’ noste èquëpe vos priye à roter dins tot l’ vëladje dëvant d’ rataker l’ saîson d’ fotbal.
Tant qu’ fé dè l’ rèclame : poqwè n’ ni causer dès djins qu’ont r’mètë nos tchapèles à noû : dë leûs potches ? Quë sâyenèt d’ lès fé conèche èvou dès pormwinrnâdes à l’ gout dè l’ roteû.
Tot ça po v’ dîre quë v’ n’èstos ni tot seû po-z-èmantchîs dès faloutes po n’ mostrer, qu’on djoû d’ssë l’anéye, dès bias djardéns à dès plaîjants tourësses, quë n’ rawaît’ront qu’ lë scwasse cénq mënëtes, sins sâyî d’ conèche lë keûr dès djins qui î vëkenèt. Sins oyë à d’vë courë à Pitrin ou à Wauve, rén qu’ po l’ vosse dë rèclame dë parvënës…
Nos dëmandans qu’one miète dë rèspèt. Cë n’èst ni tos lès djoûs qu’on pout rinde à Césâr cë qu’èst da lë ! Adon, Mélin së r’troverot tot bënauje, avou tos sès djins èchone, dins on bia p’tët vëladje, èwou qu’ë faît bon vëker, sins passer po dès bièsses.
On côp, ça va, deûs c’è-st-onk dë trop !
Mélin ègsëstéve avant vos èt ë vëk’rè cor après nos !
Tecses sol minme tinme, avou (u do) minme waloneu: