On sait k’ les Hevurlinnes ont totes
Des gueuyes d’ atote.
Passant so l’ plaece des Cånes avou l’ frezé Lambiet
Ene luskete troufelresse
Tot nos boirgnant e coisse
Nos dit : « schoûtez, don, vî,
Vinoz ene gote adlé mi
Dj’ a des clairs pantalons : loukîz çou ki vs ahåye;
Des coirsulets tot noûs : tchoezixhoz po vs fé gåy
Volez vs one grande capote avou deus rangs d’ botons ?
C’ est ene di Senateur… Djans, mwaisse, sayîz l’ on pô ! »
Mi camaeråde et mi, nos nos dlaxhîs a rire
Mais l’ frezé, pus hervete, tot dmocant l’ feme, dijha[1] :
- « Taijhe tu don, m’ vî poyon !
Nos prinss po des såvions[2] ?
Pinses tu ki dj’ vôreu mete so m’ coir tes vîs rahisses ? »
- « Vîs rahisses… franc tigneus… va-z è, flairant tchinisse ;
Va-z è, pelé comis, louke tu don dvins l’ muroe !
Avou t’ djaive kitrawtêye, ti ravizes on puroe !
Såve tu, fi d’ traite-si-pere !
Seur ki, si dj’ esteu t’ mere,
Dji t’ metreu ås Lombårds et dji broûlreu l’ biyet.
T’ es bon po blessî l’ souke[3] et po letchî l’ mayet.
Såve tu, vert måye,
Et n’ rivén måy !
Va s’ t’ egadje divins les naweas[4] !
Såve tu, ti di dj’ : on towe les laids.
Bén, djans, don, so respet, mins louke les don, Djedjene,
Ces deus beas ptits peperes ki vont co foû tot djaene.[5]
T’ as co ene feye a maryî. Vla l’ moumint, decide tu…
Li ké t’ ahåye-t i l’ mî du ces deus mimbes di Diu ! »
Et Djedjene lyi replike « Båre, t’ as råjhon tolminme :
Inte ces deus faflûtes la, dji tchoezireu… l’ troejhinme. »
Rapoitroûle di troufelresse
Ciste ouve ci egzistêye eto divins ds ôtès ortografeyes : Feller.Rapoitroûle di troufelresse
rortografiaedje da Lucyin Mahin (e rfondou walon)
Antolodjeye di Vervî, 1881 (mwaisse) / 2023 (rortografiaedje)
Rapoitroûle di troufelresse