On sét qu'lès hêvurlènes ont totes
dès gueûyes d'a-tote.
Passant so l'plèce des Cânes avou l'frèzé Lambêrt
one luskète troufulrèsse
Tot nos bwèrgnant è-cwèce
Nos dit : « hoûtez, don, vî,
Vinez 'ne gote ad'lé mi
Dj'a dès clérs pâtalôs : loukîz çou ki v's ahåye;
Dès côrsulèts tot noûs : tchûsihez po v'fé gåye
Volez-ve one grâde capote avou deûs râs d'botôs ?
C'èst-one du Sénateur… Djâ, mêsse, sèyîz-le on pô ! »
Mu camaråde èt mi, nos nos d'lahins à rire
Mais l'frèzé, pus hèrvète, tot d'mokant l'fame, pôve dire :
- « Tais'tu dô, m'vî poyô !
Nos prins-se po dès såviôs ?
Pinses-tu quu dj'voreû mète so m'cwêr tès vîs rahis′ ? »
- « Vîs rahis′… frâ tigneû… vas-è, flairant tchinis′ ;
Vas-è, pèlé comis, loukes-tu dô d'vins l'mureû !
Avou t'djêve cutrawetêye tu ravises on pureû !
Såve-tu, fis d'trête-sî péres,
Sûr quu, si dj'èsteû t'mére,
Dju t'mètreû å Lôbård èt dju broûlereû l'bilèt.
T'ès bon po blèssî l'souke èt po lètchî l'mayèt.
Såve-tu, vèrt måye,
Et n'ruvé måy !
Va'se t'ègadje divins lès nawês !
Såve-tu, tu di-dje : ô towe lès laids.
Bé, djâ, dô, su rèspèt, mais louke-lès dô, Djèdjène,
Cès deûs bês p'tits pépéres qui vôt co foûs tot djène.
T'as co 'ne fèye à marier. V'la l'moumint, dècide-tu…
Luqué t'ahåye-t-i l'mîs du cès deûs mêbes di Diu ! »
Et Djèdjène lî rèplique « Bår, t'as råhon tot l'même :
Ête cès deûs faflûtes-la, dju tchûzireû… l'treûzême. »
Sicrît li 24 di decimbe (1881).