Prumire lete da sint På ås djins d’ Corinte/X
X
1 — Frés, dji n' vou nén k' vos n' el seuxhoxhe nén ; nos peres ont tertos stî dins les nûlêyes, ils ont tertos triviersé les mers.
2 — Ils ont tertos stî batijhîs dins Moyisse, dins les nûlêyes yet dins les mers.
3 — Ils ont tertos mindjî les minmes nouriteures di l' esprit,
4 — Ils ont tertos boevou el minme bwesson di l' esprit, pask' is boevént a ene rotche ki les shuveut, yeyet cisse rotche ci, c' esteut li Criss.
5 — Totfeye, bråmint ni rivneut nén ben å Bon Diu, veyånmint k' ils ont morou dins l' wastene.
6 — Tot ça sont des egzimpes po nos po k' on n' åye nén des mwaijhès idêyes come fijhént ces djins rola.
7 — Ni divnoz nén des adoreus, come sacwants d' yeusses, shuvant çk' il est scrît : « les djins s' ashidnut po boere eyet po mindjî, ey adon eles s' levént po s' amuzer. »
8 — Ni toumant nén dins ces tchinisses la, come zels î ont tourné : vint-troes meyes d' inte di zels ont tcheyou rén k' so on djoû.
9 — Ni couyonant nén l' Signeur come ont sayî sacwants d' yeusses, k' ont stî peris pa des rampants.
10 — Ni berdelez nén come l' ont fwaît mwints d' zels k' ont stî touwés på esterminateu.
11 — Ça lzî a arivé po l' egzimpe eyet ça a stî scrît po ns advierti, nozôtes po ki l' fén des féns est arivêye.
12 — Come çoula, k' li ci ki croet esse stoké prind asteme d' nén tchaire.
13 — Gn a pont d' tintaedje ki n' åye vnou d' l' ome. Li Bon Diu est fiyåve ey i n' permetreut nén k' vos euxhoxhe des tintaedjes a l' copete d' vos foices, mins, avou li tintaedje, i vs dinrè ossu l' moyén d' e moussî foû po k' vos li pleur sopoirter.
14 — C' est pocwè, mes binamés, petez evoye des idoles.
15 — Dji cåze come a des sutîs omes ; voeyoz vos-minmes çk' i dji vs di.
16 — El cålice, ki ns ramessans, n' est i nén pårtaedjî avou l' sonk då Crisse ? Li pwin k' nos mindjans, n' est-ç' nén li coir då Crisse ?
17 — Veyånmint k' i gn a k' on pwin yet k' nos estans bråmint, nos n' estans k' on seu coir, paski ns pårtaedjans li minme pwin.
18 — Voeyoz les Djwifs : les cis ki mindjnut el tchå des ofrixhaedjes, est-çk' is n' sont nén e comunion avou l' åté.
19 — K' est-çki dji di ? K' el tchå k' on-z ofrixh åzès idoles est ene sacwè u k' les idoles sont ene sacwè ?
20 — Tenawete, çk' on-z ofrixh, on li fwait å Diåle yet nén å Bon Diu. Yeyet dji n' vou nén k' vos soeyoxhe soçons avou l' Diåle.
21 — Vos ni ploz nén boere å cålice do Signeur ey å ci då Diåle. Vos n' poloz nén esse al tåve då Signeur ey al cene do Diåle.
22 — Est-ç' ki nos vlans ki l' Signeur soeye djalot ? Est-çki ns estans pus foirt k' lu ?
23 — On pout bén fé tot, mins tot n' sieve nén ; on pout bén fé tot, mins tot ni nos fwait nén creche.
24 — K' nolu ni waite po lu, mins po les ôtes.
25 — Mindjoz tot çki s' vind å mårtchî, sins tuzer a rén po n' nén kesmessî vosse consyince.
26 — Pask' « el Daegne est å Signeur avou tout çk' ele rimplixh ».
27 — Si ene sakî ni croet nén vozôtes yet ki vs î vloz daler, mindjoz çk' on vs prezinte, sins vs fé do må, pa consyince.
28 — Mins nerén si ene djin vs dit : « çoucial, c' est èn ofrixhaedje », n' e mindjoz nén, a cåze d' ci k' vos av advizé ey a cåze del consyince.
29 — Dji cåze vaici, nén d' vosse consyince, mins del cene d' l' ôte. Pocwè est-ç' k' èm liberté sreut djudjêye på consyince etrindjire ?
30 — Si dji prind m' pårt tot-z estant gråcyî, pocwè est-çki dji sreu elaidi paski dji so gråcyî ?
31 — Adon, ubén ki vs mindjoz, ubén k' vos boevoz, eyet cwè k' vos fijhoxhe, l' fijhoz po li glwere då Bon Diu.
32 — N' soeyoz nén ene pire d' astok, ni po les Greks, ni po les Djwifs, ni po l' Eglijhe då Bon Diu.
33 — Come mi eto, dji m' rind plaijhant e tot ey a tertos, ni catchant nén po mi tot seu, mins po l' pus di djins possibe, po k' is soeynuxhe xhorés.