Prumire lete da sint På ås djins d’ Corinte/IX

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Ortografeye do scrijheu - Feller.
IX
ratournaedje da Maurice Debaty, redjårbaedje e rfondou pa Samuël Dumont
IX

1 — Est ç' ki dji n' so nén libe ? Est ç' ki dji n' so nén apoisse ? Est ç' ki dji n' a nén veyou Djezus, no Signeur ? N' estoz nén èm-n' ouve dins l' Signeur ?

2 — Si, po des ôtes, dji n' so nén apoisse ; mi ; dji l' so å moens po vozôtes, paski vs estoz li catchet d' èm-n' ovraedje dins l' Signeur.

3 — C' est la ki dji m' disfindrè conte les cis ki m' cachêynut des afwaires.

4 — Est ç' ki nos n' avans nén li droet d' mindjî yet d' boere ?

5 — Est ç' ki nos n' avans nén li droet di prinde ene soû avou nozôtes, ki soeye nosse feme, come fijhnut les ôtes apoisses eyet les frés då Signeur eyet Pire[1] ?

6 — Ubén est ç' ki mi mierseu eyet Barnabasse(a-z aveuri), nos n' avans nén li droet d' nén ovrer ?

7 — Ki n' sieve måy dins ene årmêye a si prôpe conte ? Ki plante des roejhéns yet n' elzès mindje nén ? Ki fwait paxhe des berbis, eyet ni boet nén leu laecea.

8 — Est ç' ki dji djåze come çoula come ome ? Li lwè n' el dit-st ele nén ossu ?

9 — Paski, il est scrit dins li lwè da Moyisse : « To n' muzlêyrès nén on boû cwand i spate les schågnes » Est çk' el Bon Diu a del poenne po les boûs ...

10 — ... cåze-t-i seulmint a cåze di nozôtes ? Oyi k' c' est a cåze di nozôtes ki ça a stî scrit ; li ci ki fouye el tere doet l' fé avou espwer eyet li ci ki spate les schågnes doet ewou l' espwere d' awè s' pårt.

11 — Si ns avans semé po vos les béns d' l' esprit, est çki c' est trop dmandé di mexhner les béns del Daegne ?

12 — S' i gn a des ôtes k' ils e profitnut so vo dos, n' est-ç' nén purade a vos d' e profiter ? Nerén, nos n' nos avans nén siervou d' ci droet rola, åzar nén, po n' nén eburtaker l' Evandjile då Crisse.

13 — N' savoz nén k' les cis k' ont des ovraedjes sacrés sont nouris på timpe, ki les cis ki sievnut a l' åté ont leu pårt di çk' est ofri so l' åté ?

14 — Ossu, li Signeur a ene lwè : « les cis ki braiynut l' Evandjile doevnut e viker.

15 — Po mi, dji n' m' a nén siervou d' nou d' ces droets rola, eyet dji n' sicri nén come çoula po k' on m' les dene, paski dji inmreu co mî revoyî. I gn a nole sadju ki rastibweze cisse glwere rola !

16 — Poirter l' Evandjile n' est nén po mi ene glwere, paski dj' î so oblidjî ; dj' årè des målaweures, si dji n' el fwai nén.

17 — Si dji li fwai voltî, dji serè riscompinsé ; mins, si dji li fwai conte mi gosse, c' est come on pwès ki m' sereut confiyî.

18 — Ki serè m' riscompinse ? C' est e catrucimant l' Evandjile, po rén, sins m' siervi des droets ki l' Evandjile m' a dné.

19 — Paski, minme si dji so libe eviè tertos, dji m' a metou po siervi tertos po-z e toutchî l' pus possibe !

20 — Avou les Djwifs, dj' a stî Djwif po fé come zelzôtes.

21 — Avou les cis ki n' ont pont di lwè, dji fwai come zels, paski mi, dji nd' a k' ene : el ci då Crisse.

22 — Dj' a stî flåwe avou les flåwes po wangnî les flåwes. Dji m' a fwait a tot po tertos po-z e xhorer sacwantes.

23 — Dji fwai tot çoula a cåze d' el Evandjîle, po-z awè m' pårt.

24 — Ni savoz nén k' les cis ki cournut dins les stådes, is cournut tertos, mins, gn a seulmint k' ene sakî ki wangne ? Adon, coroz po li wangnî.

25 — Tos les djouweus s' etrinnnut po-z aveur on bistocaedje materiel. Tenawete nozôtes, nos kibatans po on bistocaedje ki n' est nén materiel.

26 — Adon, mi, dji cour, nén po wangnî ; dji tchene, mins nén dins l' vude.

27 — Åy, hê, ti. Dji foirci m' coir eyet dj' el rileve po nén esse fotou foû, après awè prêtchî åzès ôtes.

  1. https://www.aelf.org/bible/1Co/9