Prumire lete da sint På ås djins d’ Corinte/VII

Èn årtike di Wikisource.
Aller à la navigation Aller à la recherche
Emojione 270F.svg Ciste ouve ci egzistêye eto divins ds ôtès ortografeyes : Ortografeye do scrijheu - Feller-Léonard.
VII
ratournaedje da Maurice Debaty, redjårbaedje e rfondou pa Samuël Dumont


VII

1 — V'nans-e å ci k' vos m' av sicrît. C' est mî po l' ome d' nén atotchî a ene feme.

2 — Portant, a cåze des etrevéns di s' kibouter, ki tchake åye ene feme yet ki tchaeke feme åye èn ome.

3 — Ki l' ome rinde a s' feme çk' i lu doet yet sifwaitmint.

4 — El feme n' a pont d' povwer so s' coir, mins, c' est l' ome : yet, sifwaitmint, l' ome n' a pont d' povwer so s' coir, mins, c' est l' feme.

5 — N' vos privez nén l' onk di l' ôte, udon-bén on momint, e-z estant d' acoird, po k' vos åyoxhe el tins pol priyire. Adonpwis, daloz eshonne po k' Satan n' vos asblawit nén po vosse flåwisté.

6 — Dji vs dit çoula, come ene åjhmince, nén come èn ôre.

7 — Dji vôreu bén k' tos les omes soeynuxhe come mi ; mins, tchaeke riçût då Bon Diu on don, rén k' po lu, onk d' ene manire yet l' ôte d' ene ôte.

8 — A tos les cis ki n' sont nén maryîs u k' ont pierdous leus comeres, dje l' zels dit k' c' est bén di dmorer come mi.

9 — Mins, s' is n' savnut nén s' espaitchî, k' is s' mareynuxhe, pask' i våt mî s' maryî ki d' tchaire rola !

10 — Ås cis k' is sont maryîs, dji dine èn ôre : nén mi, mins li Signeur : ki l' feme dimore avou cist ome.

11 — Si ele n' est pus avou, k' ele dimore sins s' maryî u k' ele rimete les catches e for avou eyet k' l' ome n' ernoye nén s' feme.

12 — A tos les ôtes, ci n' est nén l' Signeur, mins c' est mi ki dit : "si on fré a ene feme ki ni croet nén - yet k' elle est d' acoird po dmorer avou, k' ele n' el rinoye nén ;

13 — yet si ene feme a èn ome ki ni croet nén yet k' est d' acoird di dmorer avou, k' ele n' el rinoye nén".

14 — Pask' el ome ki ni croet nén dvént sint på l' feme yet l' feme ki ni croet nén dvint sinte på l' fré, ôtrumint vos efants seront taetchî, adon k' is sont sints.

15 — Si l' ci ki ni croet nén s' distaetche, pout s' distaetchî ; el fré ou l' sour n' est nén loyî dins ci cas la. El Bon Diu ns a houkî po viker dins l' påye.

16 — Taiss k' oyi, comint sawè, feme, si vos xhorez vost ome ? Ubén comint sawè, ome, si vos xhorez vosse feme ?

17 — Soulmint, ki tchaeke rote shuvant l' pårt k' el Signeur lu a fwait, e shuvant el dimandaedje då Bon Diu ; c' est insi ki dji dine des ôres dins totes les eglijhes.

18 — Est-ç' k' i gn a ene sakî k' a stî houkî, tot-z estant "discaloté" ? K' i dmane discaloté ! Onk a stî houkî, tot-z estant nén "discaloté" ? K' i n' si fé nén discaloté !

19 — El discalotaedje n' est rén yet l' contraire eto, mins ç' k' est tot, ci sont les ôres då Bon Diu.

20 — Ki tchaeconk dimane come il esteut cwand il a stî houkî.

21 — Avoz-vs stî houkî estant esclåve ? Ni vs e fijhoz nén ; mins, si vos ploz divni libe, profitez-e purade.

22 — Pask' el esclåve k' a stî houkî dins l' Signeur est libe dins l' Signeur, insi k' el ome libe k' a stî houkî est èn esclåve då Crisse.

23 — Vs avoz stî ratchté å pris foirt ; ni divnoz nén esclåves des omes.

24 — Ki tchaeke fré dimane dvant l' Bon Diu come il esteut cwand il a stî houkî.

25 — Po çk' est des viedjes, dji n' a pont d' ôre då Signeur ; mins, dji dit çki dji pinse — èn ome k' el Signeur, dins s' amiståvisté, a rindou fiyåve.

26 — Vocial çki dji pinse di bon, a cåze des dizôrnances d' asteure ; c' est bon a èn ome d' esse come çoula.

27 — Estoz-vos loyî a ene feme ? N' waitîz nén a spiyî ci loyin la ; n' estoz nén loyî a ene feme ; ni cweroz nén après ene feme.

28 — Si vs estoz maryî, vos ni froz nén on petchî, eyet si l' viedje s' mareyrè, ele ni frè nén on petchî ; mins ces djins la åront des disbåtchances dins leu coir ; yeyet mi, dji prind asteme a vozôtes.

29 — Vocial çki dji dit, fré : el vicance est coûte ; foû d' asteure, k' les cis k' ont ene feme fijhnut come s' is n' e-n avént nén ...

30 — ... les cis ki braiynut come s' is n' braiynut nén, les cis ki sont binåjhe come s' is n' el estént nén, les cis ki atchetnut come si n' avént rén ...

31 — ... yeyet les cis ki s' siervnut do monde come s' is s' siervnut nén, paski li djaive do monde passe.

32 — Paski dji vôreu k' vos soeyoxhe trankile. El ci ki n' est nén maryî s' formagne des afwaires då Bon Diu.

33 — El ci k' est maryî s' formagne des afwaires do monde, des moyéns di plaire a s' feme.

34 — Eyet il est ehårdé. C' est l' minme pol feme sins ome, come el viedje, ki s' formagne po les afwaires då Signeur, po esse sinte dins s' coir yet dins s' tiesse eyet l' ci k' est marieye s' formagne po les afwaires do monde, des moyéns di plaire a s'-n' ome.

35 — Dji dit çoula, c' est po vozôtes ; ci n' est nén po vs atraper, c' est po vos poirter a çk' est bén yet prôpe a vos loyî å Signeur, sins transixhance.

36 — Si onk pinse k' c' est on dizoneur po s' feye (viedje) di nén s' maryî yet k' ça doet daler insi, k' i fwaiye çk' i vout ; i n' fait pont d' petchî : k' on s' mareye.

37 — Tenawete, li ci ki ostant dins l' fond d' lu-minme, sins esse oblidjî yet di s' prôpe poûssåjhe eyet k' a decidé dins s' cour d' wårder s' feye vierdje, il a bén råjhon.

38 — Insi, li ci ki dine s' feye e mariaedje fwait bén, mins l' ci ki n' ele dine nén fwait mî.

39 — Ene feme est loyeye ossu lontins k' ès-n' ome vike, mins, si ç' dierin revoye, elle est libe di s' maryî avou ki ele vout. Soulmint, k' ci soeye dins l' Signeur.

40 — Portant, ele serè pus binåjhe, a m' shonnance, si ele dimane come elle est ; mi eto, dji pinse awè l' Esprit då Bon Diu.