Lidjwès, vola ene constitucion
Lidjwès, vola ene constitucion
K’ est fwaite po l’ bouneur del nåcion
I fåt k’ vos l’ acceptéxhe,
Ca çoula serè-st on brouyon
K’ i n’ vos fårè pus rfé.[1]
Djans ! corans siner tot dansant,
Djans ! corans siner tot dansant,
Nos rvénrans contins, tot tchantant :
« Vola ene bén boune djournêye » !
Nos serans påréns d’ èn efant
Ki va fé vey li vraiy.
On-z î va libe èt sins fizik,
On-z î va libe èt sins fizik,
I gn a nén mezåjhe di berikes
Po discovri l’ potêye.
Po ci-la k’ est on Merlinike, [2]
C’ est ene fameuse tchakêye !
Asteure, tot bon republikin
Asteure, tot bon republikin
Pout dire « schovlete !» a tot calin,
Et cure ses paneas d’ coisses,
Fé des boûketes et tchåfer s’ vén,
Et schoûter deus s’ troes messes.[3]
Paskeye lidjwesse del constitucion
rortografiaedje da Lucien Mahin, e rfondou walon
Schoûtez Lucyin Mahin, emey tchapele (prononçaedje zero-cnoxheu).
Paskeye lidjwesse del constitucion
- ↑ Li mwaisse modêye riscrît flotchreçmint « vôrè » po « fårè » ; li fråze pôreut motoit fé acroere ås Lidjwès ki l’ Principåté k’ ele pôrè riscrire si prôpe constitucion, so ç’ modele la.
- ↑ Abshuveu di Merlin d’ Douwai, onk des cénk mimbes do Directwere (moenneus del France al fén do 18inme sieke) k’ aveut dvou taper l’ cote sol håye e moes d’ djun 1799.
- ↑ Li paskeye rexhe li 24 di decimbe, dabôrd ki les Lidjwès vont-st aler a messe di meynute, k’ on dit a dobe u a tripe ; ele mostere eto ki les noveas mwaisses di Paris ni sont pus si disconte li rlidjon k’ å cminçmint del revolucion.