L’MULET QUI S’VINTE DÉS S’PARINTÉE.
L’Mulét d’mosieû l’curét, vintét s’mâme ell’Jumint,
In d’sant qui v’nét dé n’bonne famie !
Il s’ercrestét dé s’propre vintrie :
« Commint m’mâme, leû d’sét ti, dain l’tins l’gouvernémint,
« L’a fai alvé à s’conte dain in manéche,
« Pou no Roè, et sat’chi s’caléche ;
« Elle a sti dressée pa Loézet,
« In vétérinére ell’sognét,
« On v’l’et avoé s’pôrtrai, fauce que ç’ai n’belle Cavaye !
« Oussi, l’né mougnét né dé l’paye :
« D’lavoène à r’laye tint qu’elle in v’let. »
I n’parlét né dé s’pa, qu’estét l’pélét Baudet !
D’vénu vî on l’là mis, dain in p’tit mécanique,
Pou li sat’chi au bouriquét,
Peneû, ça l’fiét songi, à s’vie rasse dé Bourique.
Combin d’geins aujourd’hu, qui r’chenne nu au Mulet,
Vinte nu d’leû pâ d’leu mame, ell’sîn qu’a st n’saquoé :
V’nét dé n’culotte d’ouvri, ou dé n’cotte dè duchesse,
Si vo stét sain esprit, vo n’srét jamai qu’enne biesse.
