Et quoéqui travayint, comme s’il estint au fœû,
I n’trouvint né co n’vesse dé leû !
Dain l’terrain l’abouret, v’la qui semme nu d’l’avoène ;
I leû vint in rindemint, pou lés payi d’leû poène !
ça leû za moustrét l’jœû :
Rin d’muchi dain l’pachi, mai l’pa leû moustret nette :
— « Q’si travayi n’cousse rin, ça vaut pu d’enne plaquette. »
A d’zeffants sain mesti, sain keure, léyet vôs liards,
I lés brichaudront rade ! i d’véront dés peyards !
L’paufe dévint rit’che au s’tot, despu l’matin s’qu’au soère.
L’fénéant passe ess’tins à mingi et à boère !
« L’sin qu’est long à mingi,
« Est long à travayi. »
L’TIENNE DU SART QUI FAI DÉS SIENNES.
L’tienne du Sart s’avét mis à crii, à bouchi !
Si bin q’lès geins estint v’nu vire,
I rattindint, coèyant sain rire.
Qui d’allét s’desquetté ! qui d’allét s’acouchi !
Mai d’quoé ? d’in Châléroét ? ou moinse din gros villache !
Niavét d’ja sû les rangs, pou échevin et mayeure !
Clair, magister, champette, curét, instituteur !
Mai v’la ti nè in aute d’allache :
Advine in pau s’qui d’a sôrti ?
Enne sorîs ?
