Comme in Sara s’autlét su s’cotte !
A leu lit courét comme enne sotte,
Coèyant qu’il ai matin, lés fiét r’lèvé par niu.
Choutét Colas in conseye pa m’n’histoére :
« C’est q’quand on vique à milant bin su terre,
« I faut l’téni ainsi, sain s’plinte et sain bougi,
« Pasqu’on n’gangne jamai rin in v’lant toudi cangi.
L’SAINCI EIÉT SES ZEFFANTS.
In vi boul’omme, sintét qui s’édallet :
Mougni les pichoulis, pâ lès racennes !
Fai v’ni sés toés garçons, leu dit : « n’vo fiet né d’poénnes,
« Jé m’va contint j’ai fai m’paquét,
« Jé vo leye in pachi ! c’est toudi pou vos crousses,
« Mai woétét de n’nè l’vinde ! i vint co d’més parints,
« Nia n’chausse plaine d’ore, muchie dédain,
« Ainsi fouyét, scoupiét, tout d’chutte aprét l’aousse !
— N’miette aprét v’là l’pa,
Dain l’terre à canadas !
Léon, Châles et Louis, perde nu l’lousset, l’escoupe,
Lés zé v’la à r’tourné l’pachi,
Joû et niu sain lachi !
Aprét l’dînné, l’érciné, eiét l’soupe !
Tous lés toés d’s’erposé, d’sachire, il avînt hausse,
Mai i v’lint chaire su l’chausse !
