MATHIŒU LANSBERG DAIN L’PUSSE.
Mathiœu Lansberg s’tudiét lés éstoèles au stoèlï,
Boyant in l’aire, sain woéti à sés pîds !
V’la qui chai d’in in perfond pusse.
I vlét prédi l’aveni ; dain cint ins l’tins tout jusse,
L’guerre eiét l’pai, l’famenne, ell’pesse et l’môrt dés geins !
L’fin du monde et dés roès, et d’leu gouvernémints !
Nè pu long qué s’néz sain vire clére !
Quoésqui n’prédiset né q’daîn l’pusse i d’allét chaire ?
Soet dit in passant sain fasson,
D’sét qué v’la n’rutte lesson,
Pou l’pape et sés curéts, et tous leû filosofes
D’zarrachéux d’dints couvrû d’léstoffe !
« Préchant : qué l’bon Diœu fai : l’pai, l’guerre et l’colora !
« Q’du tins passét su terre, i fiét n’masse dé miraques,
« Q’nô brulons dain l’infierre si nô n’fions né nô pâques ;
« Si no mougnons dé l’châre quand l’verdi sint est là !
(Mai c’qui n’lés inpéche né, lès losses,
D’su l’vin et su l’péchon, c’jou là dé s’foute enne bosse !)
« Q’nô raviq’rons tertous, quand l’fin du monde véra !!
— Quis’qu’a sti vire l’auvau l’paradis ou l’infierre ?
No pia n’brûle toudi né, on l’fout chi pids d’zous terre !
Et i dise nu q’nô n’âme, c’est moinse que l’pu p’tit vint ;
D’allét bruler du vint ! tappét filèt là d’dain !
Mai l’mirâque enne fai pu des siennes !
Bon du tins qu’on fiét coêre — qué n’vessie çai n’lantienne !
L’fieu d’miraque, on l’fout à prigeon !
Nia pont d’mirâque pou li spaurgni s’plongeon !
Tout ça, c’est d’z’atrappes liards, pou rinpli leu malette !
I vinde nu l’paradis, comme leu n eüwe dé l’Salette.
Viquons à brafes è geins à l’zautes sain faî du maû
Nè dangi d’avoé peû in s’édallant lauvau !
D’purgatoère, ni d’infierres !
Ni co des diales tout noëres !
Bin j’vourét bin qu’on m’disse où s’qué ça est stichi ?
Si haut qu’on grippe in laire on n’pou rîn aprochî !
L’bon Diœu, méyeü qué l’poin, pasqu’on n’va né à messe,
N’pou né vô fai rosti, pou in p’tit coup d’jônnesse !
Dire qui nô r’chenne !! n’est ce né biesse eiét sot ;
Woétet l’frimousse d’à Paul Jaquot !
L’fauce dain l’monde qui moene tout, no n’poulons né l’comprinte
Fai s’pôrtrai et l’lommé, on n’pou né l’linterprinte !
L’solia lû, l’saîsô vint, chaque à tour sain cangi,
Pouquoé ? pa qui ? commint ? nia né à y songi !
C’qu’on dit : l’bon Diœu s’fout d’nous ! woétons dé nô soulagi !
I vaurèt miœu d’al’ver, l’zeffants dain l’doèt, l’dévoère,
A s’colle ligeant nô loès, qu’a l’églige dain l’prière !!
Quoé s’quî r’toune dè tout ça ? c’est qu’on n’coèt pû à rin !
Pouquoé s’qui n’préche nu né : l’raisô, l’doèt, l’jusse, ét l’bin ?
Au liœu d’no zingeusé in woétant d’nô fai coère :
Tint d’biestries, d’contes déffants, eiét d’vies é z’histoéres !
Jé m’va co vo dire enne saquoé ?
Si niavét né d’gîndarmes, d’prigeon, d’boûria, d’justisse,
Quand vo fiét maû qui vô zapisse,
Et si niavét q’l’Eglige, l’Evangile, et l’Curét,
Cint coûps par joû, on s’rét volét, strannét.
— Mai du guergni, r’chéyons à l’caufe,
Eiét r’vénons rade à no faufe :
Si Mathiœu dain s’pusse boèt toudi,
I s’ra bin plain poû li vudi.
Brammin d’geins dain c’monde-ci, woète nû au d’zeu d’leu tiesse,
Prèche nû, pâle nû, splique nû, à d’zautes qui coéye nu biesse,
Mai copu malins q’iueuses, pou vire clère dain l’papî,
I frint miœu d’woèti à leû pids.