MATHIŒU LANSBERG DAIN L’PUSSE.
Mathiœu Lansberg s’tudiét lés éstoèles au stoèlï,
Boyant in l’aire, sain woéti à sés pîds !
V’la qui chai d’in in perfond pusse.
I vlét prédi l’aveni ; dain cint ins l’tins tout jusse,
L’guerre eiét l’pai, l’famenne, ell’pesse et l’môrt dés geins !
L’fin du monde et dés roès, et d’leu gouvernémints !
Nè pu long qué s’néz sain vire clére !
Quoésqui n’prédiset né q’daîn l’pusse i d’allét chaire ?
Soet dit in passant sain fasson,
D’sét qué v’la n’rutte lesson,
Pou l’pape et sés curéts, et tous leû filosofes
D’zarrachéux d’dints couvrû d’léstoffe !
« Préchant : qué l’bon Diœu fai : l’pai, l’guerre et l’colora !
« Q’du tins passét su terre, i fiét n’masse dé miraques,
« Q’nô brulons dain l’infierre si nô n’fions né nô pâques ;
« Si no mougnons dé l’châre quand l’verdi sint est là !
(Mai c’qui n’lés inpéche né, lès losses,
D’su l’vin et su l’péchon, c’jou là dé s’foute enne bosse !)
« Q’nô raviq’rons tertous, quand l’fin du monde véra !!
— Quis’qu’a sti vire l’auvau l’paradis ou l’infierre ?
No pia n’brûle toudi né, on l’fout chi pids d’zous terre !
Et i dise nu q’nô n’âme, c’est moinse que l’pu p’tit vint ;
D’allét bruler du vint ! tappét filèt là d’dain !
Mai l’mirâque enne fai pu des siennes !
Bon du tins qu’on fiét coêre — qué n’vessie çai n’lantienne !
L’fieu d’miraque, on l’fout à prigeon !
Nia pont d’mirâque pou li spaurgni s’plongeon !
Tout ça, c’est d’z’atrappes liards, pou rinpli leu malette !
