Mårtin, li p’tit gamin k’a stî èmacralé på Pépé Crotchet

Ciste ouve ci egzistêye eto divins ds ôtès ortografeyes : Feller-Mouzon timprou — Feller-Pierret-Léonard — Rifondou.

Arimias sins mirlifitches, 2007 (mwaisse modêye di 1983)

Mårtin, li p’tit gamin k’a stî èmacralé på Pépé Crotchet

I.

- Moman, purdoz-m' vite dins vos brès:
Dji creû k' dj'a veû l' Pépé Crotchet

- P'tit arnåje ! T'as co stî trinner
Ou ç' ki dj' t'a disfindou d'aler.

- Dj'èsteu ki pècheut ås tchacås
Dins l' richê do vèvî Honaî,
Dji conteu k' c'èsteut on crapåd
Ki ramicheut dins lès djonkês,
Mins cwand dj'a veû sès crawieûs dèts,
Dj'a seû k' c'èsteut l' Pépé Crotchèt !

- Ça t'aprinrè d'aler rôler
Dins lès bôjes adlé lès vèvîs !
On bê djoû, ti t' frès apicer
Dé ène fagne, ène gofe u on bî !

II.

- Moman, rassèrez-m' dins vos brès:
Dji creû k' dj'a veû l' Pépé Crotchèt !

- P'tit ravachole, ti m' fwaîs transi.
Tire tès sokètes, vin t' rapåji.

- Dji brèchleu è-n on pèchotis'
Po vèy si mès solés poûjint.
Dji 'nn' aveu d' kère dès p'tits tchinis'
Ki, divins l' bôjrèye, grèvissint.
Cwand dj'èls a avizé did près,
‘L ont toûrné a Pépé Crotchèt !

- Ça t' sèrè bon s’i t' vint haper
Dé on sourdant u l' long d'on rî !
Minme li Bon Diu n' vout pus passer
Triviè dès fwès èt dès brôlîs.

III.

- Moman, ratwartyîz-m' dins vos brès:
Seûr ki dj'a veû l' Pépé Crotchèt !

- P'tit arlant, ti m' vous fé moru,
Ène pôve vîye fème ki n'è pout pus

- Dji m' v'leu bagnî dirî l' gargouye
Dins nosse pré, al cwète dès ônês.
Dj'a creû ki ç' n'èsteut k'ène gurnouye
Ki ram'chieut dins on p'tit frèchê.
Dji n'a måy rin vèyou d' si laîd:
Inte sès cwate dèts, il a ène pê !

- La çki c'èst di n' nin v'leûr choûter !
Dimèfèye-tu todi dès aîwes:
C'èst la k’i vint voltî rôder,
Dins lès fontinnes èt l' long dès saîwes.

IV.

- Moman, purdoz-m' so vosse djèron:
Dji so bon po k'on m' fote å trô.

- P'tit wèspiant, dji n' fijeu pont d' bin
Di t' co saveûr avå lès tch'mwins !

- Dj'èsteu ki r'loukeut dès dam'jèles
Ki voltint so l' Wézemwarin.
Il a rèchou foû d' l'aîwe, mo fel,
Avou on pèchon inte lès dints.
Mi, dj'a rabizé t't-ossu vite
K'on fonnèt k'åreut-st avou l' chite !

- C'èst l' dièrin côp ki dji t' prèvin !
Ni t' va pus tchôkî dé lès wés,
Al Goflète u paddé l' molin
On djoû, i t'î vinrè stronner !

V.

Dispu, Mårtin n'a pus rin dit,
Mins il aleut tos lès sèmdis
Baloûjner pa-t't-avå l' Prérîye
Po poleûr pèchî ås grèvîs
Èt cwèri dès trûtes dins lès basses
Come on tindeû ki rlève sès las'.

C'èst come si sès djambes l'î pwartint,
Ca dins s' tièsse, sovint, i n' v'leut nin,
Peû d' rèscontrer l' Pépé Crotchèt
K'a ène neûre pê inte lès cwate dèts,
Ki l'aveut bin èmacralé
Pusk’i n' si pleut pus espaîtcher
D' l'aler hanter tos lès sèmdis
Sins l' vèy ascwati padrî li.

VI.

Ça a dèré treûs ans å long.
Mårtin èsteut come on pèchon
K'a dandjî d' l'aîwe po p'leûr viker:
Por lu, c'èsteut l' beûre èt l' mougner.

Mins l' djoû d'vant lès Floriyès Påkes,
On pècheû a veû floter yåk
Å mitan d' l'astantche dès Treûs Sås,
Èt i n'èsteut ni fô ni sô :
C'èsteut l' Mårtin k'èsteut nèyé
Il aveut l' cwar fin k'chèrådé
Come si ène bièsse l'åreut hagnî
Et, avou sès cros, kèrnachî.
Ça n' p'leut zesse k'èl Pépé Crotchet,
K'a deûs grands dints èt yût' laîds dèts.

Il a scroté li p'tit Mårtin,
Èyèt s' mame a morou d' tchagrin.