I.
- Moman, purnèz-m' vite dins vös brès:
Dju crwâ qu' dj'ê veû l' Pépé Crotchèt
- P'tit arnôje ! T'ès co sté trin.ner
Û ç' quu dj' t'ê dusfindu d'aler.
- Dj'asto qui pèchot aus tchacaus
Dins l' rîchê du vivî Honaî,
Dju compto qu' ç'astot in crapaud
Qui ramichot dins lès djonkês,
Maîs quand dj'ê veû ses crawyeûs dèts,
Dj'ê seû qu' ç'astot l' Pépé Crotchèt !
- Ça t'aprêrè d'aler röler
Dins lès böjes addlé lès vivîs !
In bê djoû, tu t' f'rès apicer
Dé ène fagne, ène gofe û in bî !
II.
- Moman, rassèrèz-m' dins vös brès:
Dju crwa qu' dj' ê veû l' Pépé Crotchèt !
- P'tit ravachole, tu m' fwês transi.
Tire tès sokètes, vins t' rapauji.
Dju brèchlo dins in pèchotisse
Pou vèy si mes solés poûjint.
Dju 'nn' avo d' kère dès p'tits tchinis´
Qui dins la bôjrîye grévissint.
Quand dju l'z-ê avisé du d' près,
'L ont toûrné a Pépé Crotchèt !
- Ça t' s'rè bon si " I " t' vint haper
Dé in soûrdant û l' long d'in rî !
Min.me lu Bon Diu n' vut pus passer
Trivièrs dès fwès èt dès brölîs.
III.
- Moman, ratwârtiéz m' dins vös brès:
Chûr quu dj'ê veû l' Pépé Crotchèt !
- P'tit-ârlant, tu m' vus fé moru,
Ène pöve vîye fame qui n'è put pus
- Dju m' vlo bagner drî la gargouye
Dins nosse pré, al cwète dès-on.nês.
Dj'ê crwâ quu ç' n'astot qu'ène gurnouye
Qui ram'chiot dins in pti't frèchê.
Dju n'ê jamês rin veû d'si lêd:
Inte sès quate dèts, "Il" è ène pê !
- La ç' quu c' èst du n' nin vlu choûter!
Dumèfîe t' toudi d'lé lès-êwes:
C'èst la qu'"I" vint voltî rôder,
Dins lès fontin.nes et l' long dès sêwes.
IV.
- Moman, purnèz m' su vosse djèron:
Dju su bon pou qu'on m' foute ou trö.
- P'tit wèspiant, dju n' fijo pont d' bin
Du t' co sawèr avô lès tch'mins !
- Dj'asto qui rloukot dès d'mwasèles
Qui vol'tint su l' Wé-z-è-mwarins.
"Il" è rèchu fû d' l'êwe mou fel,
Avu in pèchon inte lès dints.
Mi, dj'ê rabizé t't-ossi vite
Qu'in fon.nèt qu'ôrot yu la chite !
- C'est l' dêrin cöp quu dju t' prévin
Nu t' va pus tchôker dé lès wés,
Al Goflète û pa ddé l' molin
In djoû, "I" t'î vêrè stran.ner !
V.
Dudpwîs, Mârtin n'è pus rin dit,
Mês il alot tous lès sèm'dis
Balouj'ner après la Praîrîye
Pou polu pècher aus grèvîyes
Èt quèru dès trûtes dins lès basses
Come in tindeû rilûve sès laces.
C'èst come si ses djambes l'î pwârtint,
Ca sa tiêsse, souvint, nu vlot nin,
Peû d' ranscontrer l' Pépé Crotchèt
Qu'è ène nwâre pê inte lès quate dèts,
Qui l'avot bin amacrâlé
Pîsqu'i n' su plot pus aspêtcher
D' l'aler hanter tous lès sèm'dis
Sins l' vey ascwati pa d'rî li.
VI.
Ça è dèré trwâs-ans au long.
Mârtîn astot come in pèchon
Qu'è dandjî d' l'êwe pou plu viker:
Pour li, ç'astot l' bwâre et l' mougner.
Mês, l' djoû du d'vant lès Florîyes Pôques,
In pècheû è veû floter yauk
Ou mitan d' l'étang dès Trwâs Saus,
Èt i n'astot ni fö ni sö :
Ç'astot l' Mârtin qu'astot nèyé
Il avot l' cwârps fin kchèrôdé
Come si ène biesse l'aurot hagné
Et, avu ses cros, kurnaché.
Ça n' plot z-èsse quu l' Pépé Crotchèt,
Qu'è deûs grands dints et wit' lêds dèts.
Il è scroté lu p'tit Mârtin,
Èt la mère è moru d' chagrin.
Li sôre di Feller eployî ciddé schåye les longs O del façon do sistinme Feller-Léonard po les cis rilevant do Betchfessî scrijha å (scrijha au) et al manire do sistinme Pierret po les cis rilevant do Betchfessî scrijha ô (scrijha ö).