Po-z ataker :
(cåzaedje ene miete diferin do tecse)
Il a stou constrût e 1875. Ça a duré cwanlminme catoize ans[1], paski e dijh-ût cint nonante-nouv, ça a stou fwait.[2]
E viyaedje di Gouvi, a l' adroet d l’ eglijhe, vos ploz admirer cisse grande dimorance la, basteye di 1875 a 1899. C' est ene ancyinne måjhon d’ mwaisse do docteur Scheurete, kinoxhowe come « tchestea Depoter » po-z ataker. Asteure, c' est l' « tchestea d’ Gouvi », k' a stou foirt bén metou e valeur, dispoy k' a divnou ene prôpieté cominåle.
Vos rmarkêyroz, avou, si dominance so on magnifike park.
Nos estans cial riçûs ey invités di nosse mayeur, do scabinat et di tos les ovrîs ey overresses ki, sins zels, cisse fiesse cial n’ åreut polou esse metowe so pî.
(cåzaedje ene miete diferin do tecse)
Pitite parintêze so l’ tchestea Depoter, cwand a divnou ene clinike di campagne do tins d’ l’ ofinsive des Årdènes. Cisse prôpieté la, ki lodjive adon Leyon Depoter et s’ famile, a stou rekizicionêye pa l’ årmêye almande po siervi d’ ospitå militaire. Li grand sålon fourit metou come såle d’ operåcion. Li poice sierveut d' såle d’ atinte. Les tchambes, c' esteut les dortwers, avou les payasses a minme li parket.
Les blessîs estént operés di totes les manires. On lzî côpéve minme on bresse ou ene djambe sins ls edoirmi.
(prononçaedje coinrece)
Come les medicamints estént råles, on lzî dnéve ene boune raezåde di ptit peket.
End a bråmint ki morît ey on les rastrindeut djondant del poytreye divant d' els eterer e corti avou djusse ene croes d’ bwès et leu limero d’ matricule.
(cåzaedje ene miete diferin do tecse)
Durant l’ bombårdumint d’ Gouvi, gn a ene bombe di meye kilos ki touma e l' rimouye divant l’ clinike. N' a-st on sôdård almand ki fourit essevli vicant des rtoumêyes di tere. A-st avou del tchance ki ses soçons l’ ont veyou, et s’ l' ont i polou såver.
dit a l' après-nonne di Gouvi pol fiesse ås lingaedjes walons, 27 di setimbe 2015