On-z-a d'hèrdjî l' tchèrète : lès moûnêyes sont-st-a houte,
èt, sins pus balziner, l' groumèt s' mèt' a l'ovrèdje.
I v's-apogne ine sètchêye, vis-èl tape so si scrène,
èt, tot d'rènant d'zos l' tchèdje, mousse èl tchambe dè molin
Èl neûre sipèheûr d'ine grande plèce,
èn on disdut qui v' done li hisse
èt v' tint mågré vos so l' pas d' l'ouh,
dès-èwarants-indjins s' drèssèt,
sut'nous d'in-èdjiblèdje di bwès
adjins'né di spèssès fèrayes.
Li groumèt, lu, qui k'noh lès nahes,
si winne oute di tot sins bambî,
gripe so 'ne halète qui monte dizeûr
èt tape si sètchêye al copète.
Èt c'èst chal qui l' pauve grain va pâr sofri s' mârtîre.
C'est chal qu'on l' va moudri po 'nnè fé l' blanke farène.
Lès-ustèyes sont la prètes : c'est lès toûrs di molin.
C'est d'abord li hossîre qui chèv a l' rinètî.
L'ome î vûde li sètchêye avou 'ne pougnèye di tchås,
tape l'êwe dèl vène sol rowe, èt vola tot d'on côp
qu'on p'tit djoyeûs clap'tèdje s'èlîve come ine tchanson
dizeû 1' brut d' l'êwe qui hûze èt dès fiérs qui crînèt.
Ine fwèce qui l' grain n' sâreût maîstri
vis-èl roufèle inte di deûs pires,
la wice qu'il est rôlé, strindou,
hoyou, batou. — Rindou fin sot,
vola qu'i rôle divins 'ne colîre,
la qu'on soflèdje di diâle-volant
vis-èl dihèdje di sès poûssîres
èt v's-èl hène èn on sètch.
Mins çoula n'est qu'on djeû ; vochal li deûr hikèt.
L'ome a d'dja r'pris l' moûnêye èt l'a lèyî goter
è toûr qui faît l' farène. C'est fini dè pauve ho
on nèl riveûrè måy. Inte sès djindrèyes di pire,
l'ustèye èl tint dèdja. Vo-l'-la broyî, molou ;
ci n'èst pus qu'ine poûssîre, qui l' sètchê va parti :
d'on costé, c'èst lès passes, qui l' bisteû s'è r'pahrè,
èt d' l'aute, c'èst l' doûce farène, qui l'ome s'è tchèvihrè.
Li pan dè bon Diu (Haust, 1924)/XVII
Ciste ouve ci egzistêye eto divins ds ôtès ortografeyes : Rifondou.Li molèdje