- Les djins, derit i li ptit prince, i s’ bôrèt dins des tédjévés mins i n’ savèt pus après cwè çk’ i cwerèt. Ça fwait k’ i s’ coverinèt et tourner e rond.
I derit co :
- Gn a pont d’ avance !
Li pousse ki ns avéns trové èn ravizéve nén les pousses do Sara. Les pousses do Sara, c’ est tos simpes trôs e såvlon. Ci-cial rishonnéve a on pousse di viyaedje. Mins i gn aveut nou viyaedje avår la, et dj’ aveu l’ idêye ki dj’ esténs dins on sondje.
- C’ est drole, deri dj’ å ptit prince, totafwait est presse : li troûle, li saeyea, li coide.
I riya, djonda l’ coide et fé tourner l’ troûle. Cisse-ciale ataca-st a pîler, come ene viye rabanair, cwand l’ vint a dmoré lontins essocté.
- Vos etindoz, derit i li ptit prince. Nos dispiertans l’ pousse, et vo l’ la k’ i tchante !
Dji n’ voleu nén k’ i fwaiye ene trop grosse foice :
- Leyîz m’ fé, don, c’ est trop pezant por vos.
Doûçmint, dji saetcha l’ saeyea disk’ å boird. Dj’ el meta bén d’ assene. Dj’ aveu co dvins mes orayes li tchant del troûle et, dins l’ aiwe ki frumjheut co, dji veyeu frumjhî l’ solea.
- Dj’ a soe di ciste aiwe la, fijha-t i li ptit prince. Dinez m’ a boere.
Et dji compurda çou k’ il aveut cachî après !
Dji sorleva l’ saeyea disca ses lepes. I beva, avou ses ouys cloyous. C’ esteut doûs come ene fiesse. Ciste aiwe la, c’ esteut tot ôte tchwè ki di l’ aboere. Elle aveut skepyî foû d’ nosse rotaedje dizo li stoelî, foû do tchant del troûle, foû del foice di mes bresses. Elle esteut boune pol cour, come on prezint. Estant cårpea, li loumire do sapén d’ Noyé, li muzike del messe di meynute, li doûceur des sorires, c’ est tot ça ki fjheut rglati l’ Noyé ki dji rçuveu.
- Les djins d’ amon vozôtes, derit i li ptit prince, i fwaiynut crexhe cénk meye rôzes e minme djårdén, et i n’ trouvnut nén çou k’ i cwerèt après.
- I nel trovèt nin, deri dju.
- Et portant, çou k’ i cwerèt après, i l’ trouvrint bén dins ene seule rôze ou ene miete d’ aiwe.
- C’ est bén seur.
Et li ptit prince derit co :
- Mins les ouys sont-st aveules. I fåt cachî avou s’ cour.
Dj’ aveu bevou. Dji respiréve bén. Li såvlon, ås aires do djoû, a l’ coleur del låme. Dj’ esteu binåjhe etou di cisse coleur di låme. Douvént nd aveu dju si pezant, dabôrd ?
- I fåt k’ vos tnoxhe vosse promesse, derit i doûçmint li ptit prince, ki s’ aveut vnu rashir astok di mi.
- Kéne promesse ?
- Vos savoz bén : ene muzlire po m’ bedot. Dji so respon'såve del fleur !
Foû di m’ taxhe, dji purda mes sayes di desséns. Li ptit prince les aviza :
- Vos bawobapes, on n’ direut vey des cabus, derit i tot djipant.
- O !
Mi k’ esteut si fir di mes bawobapes !
- Vost ernåd, ses orayes, on n' direut vey des coines. Ele sont trop longowes !
Et i rdjipa co on côp.
- Vos estoz-st indjusse, mi ptit boket, dji n’ saveu rén dessiner d’ ôte ki des bowas k’ on voet houte et des cis k’ on n’ voet nén houte.
- O ! ça irè ! derit i, les efants savèt bén cwè et come.
Ça fwait ki dji purda m’ croyon et s’ dessina dju on muzea. Cwand dji lyi a dné, dj’ end aveu pezant :
- Vos avoz des pordjets ki dji n’ kinoxhe nén.
Mins i n’ responda nén. I derit :
- Vos savoz bén, li djoû ki dj’ a toumé sol Tere. Ci serè dmwin l’ aniviersaire. aniversaire
Adon, après awè dmoré ene hapêye sins moti :
- Dj’ aveu tcheu tot près did ci.
Et i rodjixha.
Et adon, co ene feye, sins comprinde douvént, dji m’ sinteu tot poenneus, mins d’ ene drole di façon. Mågré ça, dji vola dmander yåk :
- Ça fwait k’ ça n’ est nén d’ astcheyance ki vos vs pormoennîz insi, i gn a ût djoûs, l’ åmatén k’ dji vs a rescontré, et k’ vos estîz mierseu a des eures et des razeures do prumî viyaedje ? Vos eralîz al plaece la k’ vos avoz tcheyou ?
Li ptit prince rodjixha co.
Adon, tot fafiant, dji deri co :
- Azår, azår ki c’ est l’ aniviersaire les cåzes ?
Li ptit prince rodjixha co on côp. I n’ respondeut måy åzès kesses, mins cwand c’ est k’ on rodjit, çoula vout dire « oyi », endon ?
- A ! fijha dju, dj’ a pawe…
Mins i responda :
- Asteure, vos dvoz-st ovrer. Vos dvoz eraler a voste éndjole. Dji ratindrè après vos vaici. Rivnoz dimwin al nute.
Mins dji n’ esteu nén franc. Dji m’ sovneu do rnåd. On riskêye di tchoûler ene miete, cwand c’ est k’ on s’ a leyî acmoide.
Hårdêye difoûtrinne