(prononçaedje eterpayis
mins, pacô, gn a on mot di rcandjî)
I gn aveut asteure ût djoûs ki dj' esteu an rac e dézert, et dj' aveu schoûté l' istwere do martchand tot boevant l' dierinne gote d' aiwe ki dj' aveu por mi.
- Â, dijha dju å ptit prince, c' est des djoleyès sovnances ki vos m' contez la, mins mi avion n' est nén co remantchî, dji n' a pus rén a boere et dji sereu binåjhe, mi avou, si dji pôreu roter tot doûçmint disk' a dlé ene fontinne!
- Mi camaeråde li rnåd!
- Mins mi ptit boket, i n' s' adjit pus do rnåd!
- Douvént?
- Paski ns alans mori d' soe!
I n' compurda nén mes råjhons, ca i responda:
- C' est bén d' avu yeu on camaeråde, minme s' on va mori. Mi, dji so fén binåjhe d' avu yeu on camaråede rinåd!
«I n' comprind nén k' nos estans e dandjî, mi deri dju e mi minme. I n' a måy ni fwin ni soe. Avou ene rayiye di solea, i fwait bén.»
Mins i m' rilouca et response a m' pinsêye:
- Dj' a soe eto. Cachans après on puss!
Dj' a fwait on djesse come onk k' est nåjhi: ça n' a nou sins d' aler cweri après on puss a l' astcheyance, e foû grand dézert. Et mågré ça, nos ns avans metou a roter.
Après avu roté des eures å lon, sins moti, li nute touma, et les stoele s' esprindént. Djels avizéve come dins on sondje, ca dj' aveu ene miete del five, cåze del soe. Les mots do ptit prince dansént dins m' mémwere.
- Ça fwait k' vos avoz soe eto? dimanda dju.
Mins i n' responda nén a m' kesse. I derit simplumint:
- L' aiwe pout esse boune pol cour avou!
Dji n' compurda nén s' response mins dji m' taijha. Dji saveu bén k' i n' lyi faleut nén dmander les pondants eyet les djondants.
Il esteut hode. I s' ashida. Dji m' meta dlé lu. Et, après on boket sins rén dire:
- Les stoeles sont beles, derit i, p' l' amoû d' ene fleur k' on n' voet nén!
Dji responda «Oyi, bén seur» et dji rwaita sins moti les pleus do såvion, pa dzo l' lune.
- Li dézert est bea, djha-t i.
Et c' esteut l' vraiy. Dj' a tofer veyou voltî l' dézert. On s' ashid so on tiene di såvion. On n' voet rén. On n' ôt rén. Et portant, gn a ene sacwè ki rglatit sins brut!
- Çou ki fwait ki l' dézert est co pus bea, derit i li ptit prince, c' est k' i catche on puss ene sadju!
Tot d' on côp, dji fouri sbaré d' avu compris l' drole di rglatixhmint do såvion. Estant on ptit valet, dji dmoréve dins ene viye måjhon. S' apinse ene ancyinne fåve, on trézôr î esteut muchî. Come di djusse, gn a måy nouk ki l' aveut discovrou et gn a motoit måy nouk k' aveut cachî après. Mins il estchantéve tote cisse måjhon la. Mi måjhon catchive on secret å fond di s' cour!
- Oyi, deri dju å ptit prince, ki ça soeye li måjhon, les stoeles ou bén l' dézert, çou ki fwait leu beaté, on nel såreut vey avou ses ouys.
- Dji so binåjhe, derit i, ki vos soeyoxhe d' acoird avou mi rnåd.
Come li ptit prince s' edoirmeut, djel purda dins mes bresses et m' rimete en alaedje. Dj' esteu tot rmouwé. Dj' aveu l' idêye ki dji poirtéve on cazuwél trézôr. Dj' aveu minme l' idêye k' i gn aveut rén d' pus cazuwél so tote li bole. Dji loukive, al loumire del beaté, li front bladjot, les ouys serés, les croles ki tronnént e vint, et dji m' dijheu: «Çou k' dji voe la n' est k' ene schoice. Li pus consecant ni s' voet nén».
Come ses lepes adrovowes sayént on dmey sorire, dji m' deri co: «Çou ki m' rimouwe si foirt dins ci ptit prince la, ki doime, c' est k' il est si fidéle a ene fleur, c' est l' imådje d' ene rôze ki rglatit dins lu come li blame d' ene lampe, minme cwand c' est k' i doime.» Et dj' advinéve k' il esteut co pus cazuwél ki çoula. Les lampes, i les fåt bén mete a hute: on côp d' vint et vo les la distindowes!
Et, tot rotant insi, al pikete do djoû, dji discrovra l' puss.