(prononçaedje eterpayis
mins, pacô, gn a on mot di rcandjî)
Ça fwait ki dj' aveu apris ene sacwè d' ôte di foirt consecant: li planete k' il è vneut esteut a poenne pus grande k' ene måjhon!
I gn aveut rén a m' sibarer d' trop. Dji saveu bén k' a costé des grossès boles come li Tere, Djupiter, Måss, Venus - totès planetes k' on lzi a dné des nos - i gn a des cints d' ôtes ki sont pa des côps télmint tchotes k' on-z a des rujhes po les vey, minme avou on téléscope. Cwand c' est k' èn astronome e discouve ene, i l' batijhe d' on limero. Metans k' i l' lome «l' astéroyide 3251».
Dji pinse bén ki li planete do ptit prince, c' est l' astéroyide B 612. C' est èn astéroyide ki n' a stî veyou k' on côp å téléscope, e 1909, pa èn astronome turk.
A ç' moumint la, il aveut stî djåzer di l' astéroyide k' il aveut discovrou dins on grand Congrès Eternåcionål d' Astronomeye. Mins gn a nouk ki l' aveut croeyou! C' esteut ses mousmints les cåzes!
Les grandès djins sont come ça.
La co bén po li rlomêye di l' astéroyide B 612, on dictateur turk a-st oblidjî ses djins a s' boter come les Europeyins. Les cis ki n' schoûtént nén estént metous a moirt. L' an 1920, l' astronome a ristî splikî cwè et come, avou si astéroyide. Il esteut bén prôpe sor lu eyet, po ç' côp la, tot l' monde a stî d' acoird avou lu.
Si dji vs raconte totes ces afwaires la so l' astéroyide B 612, eyet si dji vs a dit si limero, c' est les grandès djins les cåzes. Les grands inmèt bén les chifes. Si vos lzi dvizez d' on novea camaeråde, i n' vos dmandèt måy çou ki conte po do bon. I n' vos dmandèt måy: «Kimint çki s' vwès sone? A cwè çk' il inme li mî djouwer? Tént i les palvoles?» Neni: i vos dmandèt: «Kéne ådje a-t i? Kibén d' frés a-t i? Kibén peze-t i? Kibén s' pa wangne-t i?» C' est seulmint adon k' il ont l' idêye k' ele li cnoxhèt. Si vos djhoz åzès grandès djins: «Dj' a veyou ene bele måjhon avou des rôzès brikes, des jéranioms après les finiesses eyet des blancs colons sol toet», ele ni parvinèt nén a mådjiner cisse måjhon. I lzi fåt dire: «Dj' a veyou ene måjhon di cint meye francs.» A ç' moumint la, elle e vont: «Come c' est djoli!»
Metans k' vos lzi djhoz: «Les prouves ki li ptit prince egzistêye po do bon, c' est k' il esteut tchårné, k' i djipéve eyet k' i voleut on bedot. Cwand on vout on bedot, c' est les prouves k' on-z egzistêye», les grandès djins hôssèt leus spales eyet dire ki vos estoz efant! Mins si vos lzi djhoz: «Li planete k' i provneut, c' est l' astéroyide B 612», adon, les grands s' lairont adire eyet vos leyî e påye avou leus kesses et leus messes. I sont-st insi. Pont d' avance di s' måvler après zels. Les efants dvèt esse foirt coulants avou les grandès djins.
Mins nozôtes, come di djusse, nozôtes ki comprind bén çou ki viker vout dire, nos nd avans d' keure, des limeros! Dj' åreu bén yeu volou adrovi mi istwere a môde di conte. Dj' åreu yeu volou dire: «I gn aveut on côp on ptit prince ki dmoréve so ene planete a hipe pus grande ki lu, eyet k' aveut dandjî d' on camaeråde». Dji so si disbåtchî, tot contant ces sovnances la. I gn a ddja shijh ans di çoula, ki m' camaeråde end a nd alé avou s' bedot. Si dji waite del discrire, vaici, c' est po nel nén rovyî. C' est disbåtchant, do rovyî on camaeråde. Tot l' monde n' a nén avou on camaeråde. Et dji pôreu divni come les grandès djins, ki n' ont pupont d' agrè, a pårt po les chifes. C' est ça ki dj' a-st atchté ene boesse di coleurs eyet des croyons. C' est deur, a mi ådje, do s' rimete a dessiner, cwand on n' a jamwais rén assayî d' ôte k' on bowa cloyou et on bowa å lådje, k' on-z aveut shijh ans! Dji sayrè, come di djusse, do fé des pôrtraits les pus rshonnants possibe. Mins dji n' so nén seur d' adierci m' côp. Ene imådje, ça va, et adon, l' imådje d' après n' est pus rshonnante assez.
Dji m' brouye on pô ossu avou l' grandeu. Chal, li ptit prince est trop grand. La, il est trop ptit. Dji balzine eto pol coleur di si abiymint. Ça fwait ki dj' î va come djel sin, don ci, don la, et come dji pou. Po fini, dji m' brouyrè po des pus consecantès afwaires. Mins çoula, i mel fårè pardoner. C' est ki m' camaeråde n' esplikive måy rén. Télfeye pinséve-t i ki dj' esteu on parey a lu. Mins mi, målureuzmint, dji n' sé vey les bedots å d' truviè des boesses. Motoit so dju divnou on pô come les grandès djins. Dj' a dvou divni vî.