(prononçaedje eterpayis
mins, pacô, gn a on mot di rcandjî)
Çoula, c' est por mi l' pus bea eyet l' pus poenneus des payizaedjes då monde. C' est l' minme payizaedje ki l' ci di dvant, mins dji l' a rdessiné eco on côp po vs el bén mostrer. C' est vaici k' li ptit prince a-st aparetou sol Tere, et k' il a disparetou evoye.
Ravizez l' comifåt, ci payizaedje la, por vos esse bén seur del ricnoxhe, si on djoû vos voyaedjîz e dézert di l' Afrike. Et si on djoû, d' astcheyance, vos pasrîz avår la, dji vs e preye, ni coroz nén, tårdjîz ene hapêye djusse pa dzo li stoele! S' i gn a èn efant k' aprepe, s' i reye, s' il a des tchveas come di l' ôr, s' i n' respond nén cwand c' est k' on lyi dmande ene kesse, vos advinroz bén kî çki c' est. Adon, soeyoz djinti! Ni m' leyîz nén si poenneus: sicrijhoz-me abeye abeye k' il est rivnou.