Çoula, c’ est por mi l’ pus bea eyet l’ pus poenneus des payizaedjes då monde. C’ est l’ minme payizadje ki l’ ci di dvant, mins dji l’ a rdessiné eco on côp po vzel bén mostrer. C’ est vaici k’ li Ptit Prince a-st aparexhou sol Tere, et k’ il a disparexhou evoye.
Ravizez l’ comifåt, ci payizaedje la, por vos esse bén seur del ricnoxhe, si on djoû vos voyaedjîz e l’ grande wastene di l’ Afrike.
Si on djoû, d’ astcheyance, vos pasrîz avår la, dji vs e preye, ni coroz nén, tårdjîz ene hapêye djusse padzo li stoele ! S’ i gn a èn efant k’ aprepeye, s’ i reye, s’ il a des tchveas come di l’ ôr, s’ i n’ respond nén cwand c’ est k’ on lyi dmande ene kesse, vos advinroz bén kî çki c’ est. Adon, soeyoz binamé ! Ni m’ leyîz nén si poenneus : sicrijhoz m’ abeye abeye k’ il est rivnou.
Hårdêye difoûtrinne