.png)
Ene trisse nouvele a tcheu el 13 di djanvî : il est moirt, el grand tchampion ! El piyonî do motocross, Joël Robert nos a cwité..
C’ esteut Joël Émile Édouard Robert. Il aveut vnou å monde a Grand-Ri el 26 di nôvimbe e 1943.
Il aveut on teribe palmaresse. Waitîz purade. Il aveut dvinou tchampion do monde dins l’ categoreye des 250 cm3 e 1964, eyet etou e 1968 et 1969 dissu ene marke di moto tcheke, li ČZ (Česká Zbrojovca Strakonice). Il a rnovlé e 1970, 1971 et 1972, rola dissu Souzouki. Avou ČZ, il a eto dvinou vice-tchampion do monde dins ç’ categoreye la e 1965, 1966 et 1967.
Il a repoirté on totå di 50 Grand Pris. Al copete do martchî, il a stî tchampion d’ Beldjike dins l’ categoreye des 250 cm3 e 1963, 1964, 1966, 1972 et 1973.
E l’ anêye 1969, Joël Robert repoite el Motocross des Nåcions po no payis, el Beldjike avou Roger De Coster, Sylvin Geboers eyet Jef Teeuwissen.
Cwand k’ ès cårire di motocross a stî fineye, il a dvinou etrinneu nåcionå del Beldjike dins ç’ competicion la durant 10 ans.
Eyet e 1964, il a rçû el Pris Nåcionå do merite esportif.
Joël Robert a pris ene plaece foirt impôrtante dins l’ arivêye do motocross ås Estats Unis e pårticipant a l’ sereye di motocross Trans-AMA e 1970 et 1971. Il aveut minme sitî rconoxhou po çoula e-n estant intronijhî å AMA Motorcycle Hall of Fame avou eto Torsten Hallman e 2000.
Joël Robert esteut rconoxhou come ene sakî di naturel, mins eto come ene foice del nateure. Il a dayeur sitî tchampion do monde a l’ ådje di 21 ans.
Joël Robert s’ a rtrové eto dins l’ binde d’ imådjes do coreu otomobile Michel Vaillant : « Rodeyo so deus rowes », sôrti e 1971. Il esteut ossu dins on fime di racsegnes fwait e 1971 et ki s’ lome « On Any Sunday » avou l’ rilomé Steve Mc Keen.
Il a yeu ene veye k’ il a leyî daler e ndè profitant bén. A ene ådje avancêye, on lyi a dvou côper s’ pî a cåze d’ on traeyin di diyabete. Il a eto sofri di rujhes å peumon eyet sacwants accidints des ecdûts k’ i s’ ont shû.
Å cominçmint d’ l’ anêye, i s’ a rtrové a l’ ospitå avou l’ Corona dissu l’ dos.
El prumire grande estår do motocross est dalêye.
sicrît el 17 di måss