Les deus dierins côps ki dj’ a preparé on biyet, dji n’ aveu waire a dire puski tos les spôrts s’ ertrovént sins djins.
C’ est l’ vraiy ki l’ cronivirûsse nos a espaitchî di shure bråmint des spôrts e-n estant åtoû des teréns. Ureuzmint k’ el boesse ås imådjes esteut la. Sinon, dji m’ dimande çou ki dj’ åreu a vos dire
- Dedja k’ insi, dji so disbåtchî !
Adon, nos dalans sortot dvizer…
Yet nos cominçrans pa l’ ekipe nåcionåle.
Purade ki d’ djouwer des amiståvès pårteyes ki contnut po do boure, l’ UEFA (eyet sortot Michel Platini) aveut rever d’ organijhî on tournoe po les payis. Çoula s’ aveut ddja fwait e 2018. Après l’ pileure ki l’ ekipe di Beldjike aveut ramassé conte les Suisses (5 a 2), i faleut waitî po k’ ça passe èç côp ci.
L’ etrinneu Martinez aveut boun espwer. Po çoula, i n’ faleut nén fé el minme ereur ki divant l’ Daenmåtche po l’ dierinne pårteye. Tot s’ a bén passé. E finixhant pa ene victwere, les Diåles s’ ont cwåliyî po les dmey-finåles avou l’ France, l’ Itåleye eyet l’ Espagne (ki bata l’ Almagne pa on setch 6 a rén).
Dj’ end arive å tchampionat di Beldjike. Si l’ ekipe di Tchålerwè a fwait l’ coûsse e l’ tiesse do clasmint, i gn a asteure on ptit rlåtchmint eyet sortot bråmint trop d’ ereurs individuweles, adon ki, di dvant, el disfinse esteut boune. So les deus dierinnès pårteyes, les Gades-ås-royes s’ ont fwait egayoler cwate gôls. Eyet, les cwate côps, c’ esteut dissu ene grosse ereur d’ on djouweu.
Mins tot çoula arindje bén Brudje k’ a rpris l’ tiesse do clasmint eyet eto l’ Estandård ki vént di ratraper les Zebes. Sins conter el Berscote (ene sorprijhe) eyet Genk ki, lu, esteut ratindou. A sondjî eto k’ i gn årè ki cwate ekipes dins les plaiyofs. Adon l’ apougnåde est serêye.
E velo, adon ki les candjmints d’ ekipe ès shuvnut po les coreus, on aprind ki Fabio Jakobsen, après s’ tcheyaedje å toû d’ Pologne, a rpris ès velo. Item est i po no n-espwer bedje Remco Evenepoel k’ aveut tcheu å toû d’ Lombårdeye el 15 d’ awousse. Avou s’ fraiteure do bassén, il aveut dvou mete fén a s’ såjhon. I dveut rcomincî å toû d’ Ostraleye, mins ci-ci a stî anixhilé a cåze do virûsse. Mins nosse coreu pinse purade a 2021 eyet a onk des troes grands toûs. Eyet copurade ås Djeus Olimpikes, po-z awè ene medaye.
E-n oto d’ coûsse, Lewis Hamilton est don tchampion do monde po l’ setinme côp. Il fwait ttossu bén ki Michaël Schumacher.
Tant k’ a l’ edicion 2021 do « Dakår », ele ès frè do 3 å 15 di djanvî e-n Arabeye Sewoudite dissu on parcours a 90 åcint tot novea.
E tenisse, David Goffin aveut ddja metou ses raketes dins l’ årmwere. El limero onk di no payis, finit l’ anêye 2020 a l’ 15inme plaece mondiåle. C’ est Djokovic ki moenne el danse divant Nadal eyet Thiem.
sicrît lel 24 di nôvimbe