.png)
- Ene trisse nouvèle èst tcheûte : il-èst môrt, èl grand tchampîyon !
El pîyonier du motocros Joël Robert nos-a quitè èl 13 di janviè. C’èsteut Joël Emile Edouard Robert Il-aveut v’nu au monde à Tchèslèt èl 26 di novembe en 1943.
Il-aveut in tèrîbe palmarès. Wèyèz pus râde. Il-èsteut d’vènu tchampîyon du monde dins l’ catégorîye dès 250 cm3 en 1964, èyèt ètou en 1968 èt 1969 dissus ČZ ( Česká Zbrojovka Strakonice ) mins ètou en en 1970, 1971 èt 1972, rolà dissus Suzuki . A ČZ, il-èst égal’mint d’vènu vice-tchampîyon du monde dins c’catégorîye-là en 1965, 1966 èt 1967.
Il-a rèpôrté in totâl di 50 Grand Pris. Il d’vént ètou tchampîyon di Bèljique dins l’catégorîye dès 250 cm3 en 1963, 1964, 1966, 1972 èt 1973.
En l’anéye 1969, Joël Robert rèpôrte èl Motocross dès Nacîyons pou no payîs èl Bèljique avou Roger De Coster, Sylvain Geboers èyèt Jef Teeuwissen . Adon qu’ès’ cârière di motocros a stî finîye, il-a stî entrin.neû nacîyonâl di Bèljique dins c’compèticîyon-là durant 10 ans.
Eyèt en 1964, il-a r’çu èl Pris Nacîyonâl du mérite spôrtif.
Joël Robert èsteut r’conu come ène saquî di naturèl, mins ètou come ène fôrce d’èl natûre. Il-a d’ayeûrs ‘stît tchampîyon du monde à l’âdje di 21 ans.
Il-a yeû ène vîye qu’il-a lèyî daler en profitant bén. Avou èn-âdje avancè, on-a d’vu lî côper s’pîd à cause d’in trèyîn di diabète. Il-a ètou soufu di problèmes pulmonéres èyèt a yeû sakants ac.cidints vasculéres qu’is s’sont chûs.
Joël Robert s’a r’trouvè ètou dins l’binde d’imâdjes du coureû automobile Michel Vaillant : « Rodeo su deûs rouwes », sôrti en 1971. Il- èsteut ètou dins-in film di documentâcîyon fét en 1971 èt qui s’lome « On Any Sunday » avou l’célèbe Steve Mc Queen.
Joël Robert a pris ène place fôrt impôrtante dins l’arivéye du motocros aus-Etats-Unis en pârticipant à l’sérîye di motocros Trans-AMA en 1970 èt 1971. Il aveut min.me stî r’conu pou çoulà en èstant intronisé au AMA Motorcycle Hall of Fame avou ètou Torsten Hallman en 2000.
Au cominch’mint d’l-anéye, i s’a r’trouvè à l’opitâl avou l’Corona dissus l’dos. El preumîyère grande star du motocros s’èst daléye.
èscrît è mwès d' fevrî