- Lès deûs dérins côps qui dj’é préparè in bîyèt, dji n’aveu wêre à dîre puce qui tous lès spôrts s’èrtrouvit sins djins.
C’èst l’vré qui l’corona virus nos-a èspétchî di chûre autoû dès tèréns bran.mint dès spôrts. Eûreûs’mint qu’èl bwêsse à imâdjes èsteut là. Sinon, dji m’dimande çu qui dj’âreu à vos dîre.
- Dèdjà qu’insi, dji seû disbautchî !
Adon, nos dalons surtout d’vîser di fotbale.
Eyèt nos cominch’rons tout d’abôrd pa l’èquipe nacîyonâle.
Pus râde qui d’djouwer dès amicâles pârtîyes qui comp’t’nut pou du bûre, l’UEFA (èyèt surtout Michel Platini) avît rêvè d’organiser in tournwè pou lès payîs. Coulà s’èst rèyalisè en 2018. Après l’gros problème qui l’èquipe di Bèljique aveut yeû conte lès Suisses (5 à 2), i faleut wétî pou qu’ça passe ès’ côp-cî.
L’entrin.neû Martinez aveut bon-èspwêr. Pou çoulà, i n’faleut nén fé èl min.me èreûr divant l’Dan’mark pou l’dérène pârtîye. Tout s’a bén passè. En finichant pa ène victwêre, lès diâbes ès’ sont qualifiès pou lès d’mi-finâles avou l’France, l’Italîye èyèt l’Espagne (qui vént di bate l’Al’magne pa in 6 à rén).
Dji d’arîve au tchampionat di Bèljique. Si l’èquipe di Châlèrwè a fét l’cousse à l’tièsse du class’mint, i gn-a asteûre in p’tit r’lach’mint èyèt surtout, adon qui di d’vant èl disfinse èsteut boune, bran.mint trop d’èreûrs individuwèles. Su lès deûs dérènès pârtîyes, lès gades à rôyes ont encaissès quate côps èyèt c’èst dissus quate côps in grosse èreûr d’in djouweû.
Mins tout çoulà arindje bén Bruges qu’a r’pris l’tièsse du class’mint èyèt ètou l’èstandard qui vént di ratraper lès zèbes. Sins compter èl Berschot qu’è-st-ène surprîje èyèt Genk qu’èsteut ratindu.
A sondjî ètou qu’i gn-âra qui 4 èquipes dins lès plés-ofs. Adon èl bagâre èst sèréye.
En vélo, adon qui lès candj’mints d’èquipe ès’ chuv’nut pou lès coureûs, on-aprind qui Fabio Jakobsen, après s’chute au toûr di Pologne a r’pris ès’vélo. Il-èva d’èl min.me afêre pou no n-èspwèr bèlje Remco Evenepoel qu’aveut tcheut au toûr di Lombârdîye èl 15 d’awous’. Avou s’fractûre du bassin, il-aveut d’vu mète fén à s’séson.
I d’veut r’cominchî au toûr d’Australîye, mins il-a stî suprimè à cause du virus. Mins l’coureû pinse pus râde à 2021 èyèt à in dès trwès grands toûrs èyèt surtout aus Djès Olimpiques pou z-awè ène mèdâye.
En-auto, Lewis Hamilton èst don tchampîyon du monde pou l’sètième côp. Il fét t-t-ossi bén qui Michaël Schumacher.
Pou l’édicîyon du Dakar 2021, i s’f’ra du 3 au 15 di janvièr en Arabîye Saoudite dissus in pârcoûrs à 90% nouvia.
En tènis, David Goffin aveut d’djà mètu sès raquètes dins l’ârmwêre. El lumèrô yin di no payîs, finit l’anéye 2020 à l’15 ième place mondîyâle. C’èst Djokovic qui mwin.ne èl danse divant Nadal èyèt Thiem.
èscrît èl 25 dè nôvimbe