L’VI GRISON INTRÉT SES DEUX MAITRESSES.
Pou in vi homme, c’est comme in s’pot :
On dit toudi : Pu vî, pu sot !
Quand on pinse à ça, nia d’quoé brére !!
In vi grison, poèfe et sé, tout casset,
D’viqui jônne homme davét assèt !
Il estèt tins pour li d’cachi aprèt n’coumère,
C’est malaugi quand on d’vint vi !
Mai il avet des claus ! — c’est d’jà brammin pour plére,
Quand on z’est bin dain ses papîs !
Avet ça l’laid d’vint bia, l’vî d’vint jônne, eiet l’biesse
Passe pou avoé dé l’tiesse,
I couret les ducasses ! à l’fin fauce dé cachi,
Deux veuves v’lint li tapper dain louye :
Iune, griche ! su l’ertour d’âche, auret v’lu l’amanchi,
L’aute jônne, né co trop mau, eiét noère comme dé l’houye,
V’là qui s’adaye à fai l’amour !
Achi intrét ieuses deux, on l’lertoche, on l’lerlèche,
Elles sarquélint s’brouche chaque à tour ;
Ell’vie sachet les noères pa mèche !
Pou qui fuche couleûre dé s’faux tour !
Et l’jonne pluquêt les gris, su l’tins qui s’féyint l’cour !
Elles l’liont si bin plumèt s’tignasse,
Q’dés ch’fias, i’n’da d’meurét qué l’plasse !
In vrai gant d’Anséreuse ! enne tiesse comme in vi g’noux !
« Asset, disti, et joquèt vous,
« J’nai pu pont dè ch’fia, mai j’m’in fout,
« Jévoye ell’mârriache au cint diale !
« Vo mauri aringi ch’qeune eune à vo fasson,
« Vo m’perdét més soyes pou l’lesson,
« Mai d’fai l’amour, qui n’duche pu iun qui m’pâle.
C’est co augile dé iesse marriét,
Mai avèt qui, s’est s’tenne saquoè !
C’n’est qu’in d’mi mau quand l’feume est bonne,
Mai si l’toûne dé iesse moèche, c’est s’tin diale dain l’mogeonne !
I vaut ostant d’meuré tout seû !
D’vint d’choési nia d’quoè avoè peû !
Enne bonne, c’est l’paradis, eiét n’moèche, c’est l’infierre,
Q nô féyons bin assêt su terre.