L’Lieffe eiét sés orayes

Èn årtike di Wikisource.
[ 74 ]

L’LIEFFE EIÉT SÉS ORAYES.

(Les oreilles du Lièvre.)

Enne biesse a coine in joû avét trawét tout outte,
Ell’bazane d’in Lion ! v’la qui s’fout à crii,
Mastinant tout costèt dain les biesses in déroutte :
Q’tout s’qui pôrtèt des coines d’vèt spitté du payi !
Sain sé l’fai dire deux coups, i ramasse nu leu loques,
Nia né à rire avèt sés broques !
Vatches, torias, bôus et cerfes, béraux, gattes ét gadlots,
Toute ell’ chilée foût l’camp dés bots !
In Lieffe woète ses orayes, proû i trianne plain s’vinte !
Peû q’pou des coines, enne racusette lés printe.
— « N’est ce né pou brère, disti, c’est comme deux d’vant d’gilet !
« Et né tant d’contes, jé fai m’paquét ! »
Mai d’vant d’pârti i séva dire arvoère,
A s’camarade, enne vie biesse noère :
— « Commint, distelle, tu m’fous in adiœu d’suisse ainsi ?
« T’n’as q’dés orayes, on n’pou né t’ramassi.
— « J’ai trop peû, disti l’Lieffe, qu’on n’mé cheye su m’cabosse,
« I dîront q’c’est dés coines, coines dé Rinocérosse !
« Jé su trop foipe pour ieuses droci,
« J’aurai bia dire, jé s’rai pissi. »

[ 75 ]
MORALE :

Chéyét dain les grawes dé l’justisse,
Des gindarmes, des gablous, dés mouchards, dé l’polisse ;
N’dint conte vous, l’aire minabe, vo pass’rét pou vaurin !
Nulu pou vô r’blanchi ; parlét, ça n’chièfe à rin.
Vo stét coupabe, ou bin complisse !
Evoye cousin, pou l’cour d’assisse.