- Ôdjoûrdu, dji m’è va vos d’vîsér d’ène coureûse a vélo. Ele ès’ lome Lotte Kopecky èyèt a v’nu ô monde a Rumst èl 10 di novembe an 1995.
Ele coûrt t’ t-ossi bén dissus l’ route qui dissus pisse.
Lotte a cominchî s’ cârîyère come cyclisse a l’âdje di 9 ans. Ele fèyeut adon du cyclo-cross come ès’ frére. Pou chûre, come èle wèyeut çoula voltî, èle a rintrè dins-ène èscole « Top spôrt », qui mache èl pratike du spôrt avou lès scoles. Mins come èl cyclo-cross n’èst nén ène dissipline olympike èyèt qu’i faleut çoula come condicîyon pou fé pârtîye du diplome, èle a candjî s’ fusike d’èspâle èyèt s’a dirigè viès l’ pisse èyèt l’ route.
An 2015, èle ès’ fét bate ô sprint ô troféye Wynants.
V’la qu’an 2016, èle fét pârtîye di l’èquipe Loto-Soudal. Lès rèsultas vont cominchî a s’ chûre. Cominch’mint du mwès d’ mé, èl rèpôrte èl troféye Maarten Wynants. Ôs tchampionats d’Europe èspwêrs su pisse, èle rèpôrte lès tites an cousse ôs pwints èyèt ètou l’omnium.
Pou chûre, ôs tchampionats d’Europe, èle ès’ classe trwèsième di l’omnium èyèt surtout rèpôrte ès’ preumî tite dins l’ cousse al amèriquène avou Jolien D’Hoore.
Lotte Kopecky a in bia palmarès, mins nos dalons d’vîsér di l’anéye 2023 qui s’ra probâbe èl pus-impôrtante d’ès’ carîyère. El 15 di mârs, èl gâgne èl Nokere Koerse, pôrtéye pal souv’nance d’ès’ frére môrt èl wékène di d’vant èt bén dècidéye di lyi rinde omâdje. El 2 d’avrî, èle rèyussi èl doublè ô Tour dès Flandes. Pou chûre, c’èsteut l’ toûr di France. Ele rèyussi a gâgnî l’ preumîyère ètape èyèt prind l’ djône mayot.
Ele rèyalisse la in grand lumèrô dins lès reûwes di Clèrmont-Fèrant. Après l’ cousse, èle a lachî qu’èle rêveut di çoula dispus in momint. Ele èst d’vènûwe èl preumîyère bèlje a pôrtér èl djône mayot dins s’ nouvia fôrmat. El toûr èst long di wit ètapes. El feume a wârdè l’ djône mayot djusse qu’al avant dérène ètape avou l’arivéye ô d’zeûs du Toûrmalèt. Après l’ dérène, in conte èl monte, èle a fini deuzième du gènèrâl èyèt preumîyère du class’mint pa pwints an eûchant èl vèrt mayot. Ariveut adon èl tchampionat du monde a Glasgow. Su pisse, èle rèpôrte èl cousse pa éliminâcîyon. Ele gâgne ètou èl cousse ôs pwints.
Eyèt èl 13 d’awous’, èle rèpôrte, an-arivant méreseûle èl cousse an line. An fèyant ès’ n-ataque a mwins di chîj kulomètes di l’arivéye divant Cecilie Vollering èyèt Uttrup Ludwig. Ca fét trwès mèdâyes d’or èyèt yène di bronze.
Gn-aveut 50 ans qu’ène bèlje (Nicole Vandenbroeck an 1973) n’aveut gâgnî in tite mondiâl. L’èrcôrd mondiâl, c’èst l’ francèsse Jeannie Longo qu’èl tént avou cénq tites.
El feume di no payîs qu’a yeû l’ pus d’ tite, c’èst Yvonne Reynders. Ele a stî yène dès pus grandes coureuses a vélo dès anéyes 60 an eûchant 12 mèdâyes dins lès tchampionats du monde. An line, quate d’or èt deûs d’ârdjint. An pourwuite, trwès d’or èt trwès d’ârdjint. A l’âdje di 86 ans, èl 15 d’awous’, èle a co donè l’ dèpârt d’in Grand pris pôrtant ès’ no.
Tins qui dj’i seû, mon lès-omes, èl toûr 2023, 110 ième édicîyon, a stî rèpôrtè pou l’ deuzième côp d’ chûte pa Jonas Vingegaard qu’a apougnî l’ djône mayot al chîjième ètape sins pus l’ lachî.
Du costè dès bèljes, Philipsen a yeû l’ vèrt mayot. Campenaerts èl pris dèl combativitè èyèt Meeus a gagnî dissus lès Tchamps Eliséyes pou l’ dérène ètape. Quand a Wout Van Aert, il-a passè saquants côps asto dèl victwêre, mins n’a nén seû d’apougnî yène.
eplaidî e rfondou dins l' Rantoele 107