- Ôdjoûrdu, dj’é yeû l’idéye di vos d’vîsér di fotbale èyèt pus spéciâl’mint di l’èquipe di Bèljique.
Pou in p’tit payîs come èl nôwe, on pout dîre qui lès résultats ènn’ sont nén trop mwés. Bén-ètindu, is n’ont co jamés gâgnî ène coupe du Monde ou co bén minme d’Europe. Mins gn-a dès résultats qu’on pout r’tènu.
Pou l’ pètite istwêre, is-ont pârticipè 14 côps al coupe du Monde an-èstant in côp trwèsième an 2018 èyèt sèt côps a l’Euro avou ène trwèsième place an 1972 èyèt èstant finâlisse an 1980.
No payîs vént di fini preumî d’ès’ groupe pou l’Euro di 2024 divant l’Ôtriche, èl Suwède, l’Acèrbadjan èyèt l’Estonîye .
A sèt mwès du tournwè an-Al’magne (du 14 jwin ô 14 di djulèt), qwè-ç’ qui nos plons r’tènu di l’èquipe ?
Avou dès djouweûs tél qui Hazard a leû tièsse qu’ont dècidè di lèyî la leû n’èquipe nacîonâle, on poureut s’ dimandér comint nos djouweûs vont yèsse mindjî sins leûs grands nôs.
Pourtant, gn-aveut saquants bons djouweû qui bouchî a l’uch di l’èquipe. Tèrtous sént bén qui l’antrin.neû Martinez ènn’ wèyeut nén voltî di candjî branmint.
Kevin De Bruyne, d’ès’ costè, s’a blèssè cominch’mint du mwès d’awous’ èt n’a nén tout djouwè. Romélu Lukaku pète dès flames èyèt mârque come i vout (4 côps èl dèrène pârtîye èyèt 14 buts an 590 munutes). El Bèljique n’a nén stî batûwe an wit pârtîyes èyèt fini lès-éliminatwêres avou 20 pwints.
El jènèrâcîyon qu’on lomeut doréye a quasimint passè l’mwin èyèt is-ont bén cârtonè an-éliminatwêres. N’impétche qu’i gna- yeû dès pârtîyes woù nos djouweûs n’ont nén fét dès spites. Wétèz d’ pus près lès pârtîyes conte l’Acèrbadjan (0 a 1) èyèt l’Ôtriche (2 a 1) cominch’mint d’ l-ôtomne.
Avou l’arivéye d’in nouvia antrin.neû Todesco Dominico, on pout dîre qu’i gn-a n’ saqwè di candjî ? C’èst malôjî a dîre pou l’ momint. Si gn-a co saquants câdes come Carrasco, De Bruyne, Vertongen èt bén seûr Lukaku, … qui sont d’meurès, i gn-a dès-ôtes qui confir’nut l’ bén qu’ont pinseut d’yeûsses come Trossart ou Batshuayi. I gn-a dès-ôtes qui bouch’nut a l’uch di l’èquipe nacîonâle come Faes, Théate, Onana, Doku, Lukébakio, Bakayoko èyèt co dès-ôtes.
Bén seûr, èl quèstîyon qui tèrtous voureut ène rèsponse, c’èst di sawè qwè-ç’ qui cès djouweûs-la vont fé an-Al’magne ô contaque dès grands d’Europe. El rèsponse, nos l’ârons pus’ qui probablèmint ô cominch’mint di jwin èyèt èspèrons dins l’ courant di djulèt. A ç’ te eûre, i fôt vîr ètou comint s’ra l’ fôrme di nos djouweûs, mins ètou dès-ôtes payîs qui s’ront lôvô.
El Bèljique a discrotchî s’ bîyèt ôjîy’mint èyèt ètou èl drwèt di yèsse tièsse di sérîye. Ô momint di scrîre l’ârtique, dji n’ sé nén co qui s’ra dins leû groupe. Mins vos-ôtes, an l’ lîjant, vos sârèz dèdja èl nô dès-èquipes qui djouw’ront conte lès roudjes diâbes.
Eyèt lès-ôtes ? El Serbie n’aveut nén co pârticipè a in tchampionat d’Europe. El portugal è-st-an forme avou 36 cops d’ mârquè conte deûs seûl’mint d’ancaissès. El france a batu Gibraltar pa 14 à rén. L’Anglètére n’èst nén trop an fôrme èyèt l’Italîye vént d’ passèr pô tchat d’ l-èwuîle. L’Espagne è-st-ène valeûr dès mèyeûses.
Pou l’ pètite istwêre, seuchèz qui dès p’tis payîs come Malte, Sint-Marin, èl Liechtenstein èyèt co Gibraltar n’ont nén seû mârquér in méreseû côp durant lès qualificacîyons.
I nos fôt awè l’èspwêr qui l’èquipe s’ra an mèyeûse condicîyon qui l’èstâde Rwè Bôdwin woù i n’a nén stî possîbe di djouwér pace qu’il-aveut ploût.
Viv’mint èl 14 di jwin divant l’ bwêsse ôzès-imâdjes pou vîr dès bèlès pârtîyes èyèt l’èspwêr qui no p’tit payîs fèye dès spites.
Escrît èl 27 di novembe 2023; eplaidî e rfondou dins l' Rantoele 108