- Mi, l’èspôrt qui dji préfère dins tèrtous, c’èst bén l’fotbale. Mins djusse après, c’èst l’vélo !
Sacrè Louwis va ! Cominch’mint du mès d’mé, i ‘steut bén dècidè di wétî toutes lès-ètapes du toûr d’Italîye. El Giro, dècidè pa l’gazète italiène « Gazetta della sport » en 1909 fét pârtîye dès trwès grands tours avou l’ cén di France èyèt d’Espagne (Vuelta).
Remco Evenepoel, no tchampion bèlje aveut gâgnî s’ preumî grand toûr l’anéye passéye avou l’toûr d’Espagne, lèyant là in manque di 44 ans pou lès bèljes.
Adon qui sakants supôrtèrs crwèyît qu’i daleut couru èl toûr di France, ès’ dirècteûr spôrtif, Patrick Lefevere, trouveut qu’i n’faleut nén brûlér trop râde lès-ètapes èyèt èl dècideut di couru èl toûr d’Italîye 2023.
El coureû èyèt toute l’èquipe èstît bén préparè pou z-ataquèr èl coûsse di trwès samwènes. Eyèt come di djusse, èl favori di tèrtous gâgneut èl preumîyère ètape qu’èsteut in conte la monte avou 43 s’condes d’avance su l’aute favori, l’èslovène Primož Roglič.
Etou, du minme côp, Remco vèneut di mète èl rôse mayot dissus sès ‘spales. C’èsteut bén lancî pou l’tchampîyon di no payîs. El deuzième ètape ès’ passeut sins pont d’trèyin. Come quasimint prévu pa lès conècheûs, faleut lèyî r’tchére èl prèssîyon èyèt lèyî l’ rôse fraque à ène saquî d’ôte. C’èst çoulà qu’i s’a passè su l’trwèsième ètape avou l’prîse di pouvwêr du norvéjîyn Andréas Leknessund.
Deûs djoûs pus tôrd, dissus èl cénquième ètape, Evenepoel a tcheut deûs côps dissus lès vôyes trimpéyes di Campanîye. El preumî côp, c’èsteut à cause d’in tchén lèyî là pa s’propiètére. El deûzième côp, èl coureû a ridè dissus in passâdje pou piètons. Eyèt dîre qu’ès’ djoû-là, c’èsteut ène ètâpe woù lès coureûs ènn’ duvît nén s’trècassî puce qu’i gn-aveut pont di dificultè dissus lès 171 kulomètes intrè Atripalda èyèt Salèrme. Pou l’pètite istwêre, l’anglès Marc Cavendish a ètou tcheut. Mins li, c’èsteut dins l’èbalâdje du sprint finâl.
Es’ djoû-là, in deûzième coureû, après Clément Russo, c’è-st-Alletti qui dwèt lèyî là l’ p’loton pou réson di Covid. Ariveut èl preumîyère ètape di montagne èl vèrdi. Après qui 23 omes avît pris 11 munutes d’avance, c’èst Blois qu’a sprintè l’preumî al coupète dès 2100 mètes. I gn-aveut pont d’candj’mint au gènèrâl. L’afêre qu’a mârquè lès djins ès’ djoû-là, c’èst qui Evenepoel s’a èvolè en-élicoptère pou ralér à s’n-ôtèl pus râde qui lès-autes en vwètûre.
Adon, lès conècheûs ont cominchî à s’ pôsér dès quèstîyons. Su l’ètâpe lumèrô wît, Roglic èrpèrdeut 14 sucondes à Evenepoel dins-ène ètape di montagne avou trwès cols. Insi, i r’vèneut trwèsième padrî Remco.
El dimègne, c’èsteut l’conte èl monte di 35 kulomètes di Savignano à Cesena. I gn-aveut pont d’bosse mins bén du vint èyèt d’èl plouve. Evenepoel èst pârti trop fôrt au cominch’mint èyèt a d’vu r’lèvér l’pîd pou fini. El coureû gâgneut djusse avou ène suconde d’avance su l’ gal’wès Gerain Thomas qui d’vént deuzième à 45 sucondes au gènèrâl. Roglic, li, è-st-à 47 sucondes. Bran.mint trop wêre d’avance. Après l’arivéye du djoû di d’vant, lès-èspéciâlisses ès’ pôsît dès quèstîyons.
El tèrîbe nouvèle a tcheut sakantès-eûres après. Adon qu’èl coureû aveut fét in tèsse, i ‘steut positif au Covid. Tout n’èsteut pourtant nén loyî à dès simp’tômes. L’èquipe fèyeut dès controles intrè yeûsses, min.me si l’èspôrt à vélo èst l’èspôrt èl pus tèstè di tèrtous.
Dins l’bwêsse à imâdjes, lès djins ont vèyu èl feume da Remco qui lyi a fét r’mârquér qu’il-aveut in bouton d’fîve. El coureû lyi a rèspondu « qu’i daleut tchére malâde ». Come di djusse. C’èsteut l’ tristèsse amon Lotto-Soudal. L’èquipe pièrdeut ès’ chèf.