- Et bén d’è v’là co yène di finîye !
Toudis vos d’vîser di spôrt, c’èst bén. Mins dji m’dimande pacôps si nos p’lons yèsse fîrs di nos r’présintants. Dji m’va cachî di chwèsî ène dîjène di spôrts èyèt nos d-alons vîr si mès-omes (èyèt feumes) fèy’nut tchanter no coq walon.
On cominche pau basquèt. Beghin èyèt Hervelle font pârtîye dès mèyeûs djouweûs europèyins. En coupe d’Europe l’èquipe di Mons-Hénaut a fét in bia pârcoûrs èyèt lès Spirous d’Châlèrwè ârît p’lu … avou ène mîyète di …
En coûsse à pîds, dji pinse à l’famîye Borlée. Jonathan èyèt Kevin sont bén-ètindu lès locomotîves di leû spôrt. Min.me s’is n’ont nén seû ramwin.ner ène mèdâye dès Djès Olympiques di Londes, adon qui lès mètings ès’ chuv’nut, is nos fèy’nut frum’jîs.
En vélo, après ène séson du ton’wêre, Philipe Gilbert s’a èdôrmu ène mîyète. Mins pou s’rèvèyî au bon momint. Quand il a placè s’dèmarâdje au Caubèrg, toute èl Walonîye lî a donè in côp d’mwin en s’èr’drèssant dissus sès pèdales.
Nos d-arivons d’djà au fotbale. I gn-a yeû l’montéye en divisîyon yin dès gades à rôyes du Spôrting di Châlèrwè. Du costè dès diâbes roudjes, èl nouvia entrin.neû, èl walon Marc Wilmots è-st-en trin di poussî sès djouweûs pou d-aler au Brésil. Divant lî, èl dérin a lès mwin.ner èsteut Waseige en 2002 au Japon. D’èn-aute costè, lès transfèrts di saquants djouweûs walons fèy’nut dès spites. Après Van Buyten, gn-a yeû Fellaini, Legear, Mirallas, mins surtout Eden Hazard èyèt Axel Witzel qui leû club ont disboursè pus di 40 mîyons d’Euros.
Mwins conu du grand public, èl golf avou Nicolas Colsaerts qui d’meure dins l’Brabant walon. Il a rèyussi à yèsse dins lès mèyeûs spécialisses èyèt min.me a pârticiper à l’Ryder Cup, èl grand raploû dès amateûs di 18 trôs.
En djudo, c’èst deûr di rèplacî Isabelle Lomba èyèt Nicole Flagothier. Mins Christine Van Snick a tout d’min.me rèyussi à ramwin.ner ène mèdâye di bronze di Londes.
El moto cross a toudis stî in spôrt d’amon nos-autes avou Joël Robert, Jobé, Rahier ou Malherbe. En-ome di Mons, Clément Desalle, èst su l’boune vôye pou lès chûre.
Si on d’visse di tènis, on pinse naturèl’mint à Justine Henin. Mins èle a pris s’pensîyon.
Eûreûs’mint, mon lès-omes, après Steve Darci èyèt lès deûs fréres Rochus, vèl-cî in p’tit djon.ne qui moustère èl dibout d’ès’ nèz. I s’lome David Goffin. Nos-avons ètindu d’vîser d’lî au tournwè d’Roland Garos woù-ç’qu’il a falu in bon Federer pou l’éliminer. In spôrt qui nolu ènn’ conèt (ou à pau près), c’èst satchî à l’carabine di coutchî. El lidjwès Lionel Cox nos-a r’vènu avou ène mèdâye d’ârdjint dès Djès Olympiques. Et dîre qui c’èst djusse èn-amateû !
Dins lès mwin.neus d’autos, Jérome d’Ambrosi èst trwèsième pilote mon l’écurîye Renault-Lotus. Il a l’èspwêr d’awè in volant èl séson qui vént. Eyèt dins lès ralîyes, yin qui va bénrâde pèter dès flames ès’ lome Thièry Neuville.
Di timps-in timps, Jean-Michel Saive, en tènis di tâbe, pout co nos-ofru saquants bèlès pârtîyes pou moustrer l’èc.simpe aus djon.nes.
V’là don ène dîjène di spôrts woù-ç’qui lès spôrtifs walons mous’tèr’nut leûs spurons pou satchî lès-autes dissus l’boune vôye d’èl victwêre. Eyèt dîre qui lès spôrtifs manqu’nut di sales, di bassins d’natâcîyon, di pisses èt di tèréns ! Alèz, boune anéye à tèrtous (avou in moncha di spôrt) èt boune santè (pou d’è fén) !