- Lès-imâdjes d’èl bwêsse ès’ bouscul’nut. I gn-a bén trop d’concoûrs en quénze djoûs. Ca d’vreut durer in mwès !
- Mi, djâreu bén in goût d’trop pau !
Bran.mint di spôrtifs ont fét d’s-èfôrts pou cachî d’ariver au plus waut nivau mondiyâl.
Es’côp-cî, c’èst fét : lès Djès Olympiques sont bén finis. Qwè-ç’qu’i gn-a à r’tènu pou nos-autes lès walons ? Deûs mèdâyes ! El méreseûle mèdâye d’ârdjint pou ène saquî qu’è-st-èn-amateûr. C’èst Lionel Cox au tîr coutchî à 50 mètes. L’aute, c’èst Charline Van Snick qui l’a yeû en djudo èyèt èle èsteut en bronze. A paurt çoulà, rén !
C’èst l’désèrt ! Saquants atlètes walons ont ratè leû raploû mondiyâl. On pout doner lès nôs da Kevin èt Jonathan Borlée, Filipe Gilbert ou co Djan-Michel Saive.
Mins si on vout rèflèchî à l’situwâcîyon, èle n’èst nén mèyeûse du costè flamind avou ène mèdâye di bronze pou Evi Van Acker en vwèle.
Au totâl, dissus lès 115, on pou r’tènu qui gn-a 15 bèljes qu’ont fini dins lès wît preumîs.
Mins qwè ç’qui n’toûne nén rond ? Lès spôrts divèn’nut di pus-in pus profèssionèls èyèt çoulà dins toutes lès dissiplines. Min.me s’il èst bén malaudjî di comparer lès dificultès dins lès difèrents spôrts, mins ètou lès-èfôrts à fén pou z-awè ène mèdaîye. Ene aute quèstîyon èst d’sawè pouqwè lès céns qu’ont ratindeut come Clijsters, Boonen ou lès Borlée n’ont nén rèspondu à l’apèl, adon qui lès Cox, Van Snick èt Van Acker èstit là.
El Comité olympique interfèdèrâl bèlje aveut chwèsî wît spôrts woù-ç’qui dès mèdaîyes èstit possîbe. Dins l’tas, deûs ont arivè : vwèle èt judo.
Dj’é ètindu dîre qui c’èsteut l’mentalitè d’amon nos-autes. Lès-atlètes dîy’nut : « C’èst dèdjà bén di yèsse là » ! Mins qwè-ç’qu’i faureut candjî pou qu’ça vâye myeû èt qu’on eûche di l’ôr come du timps dès Henin, Werbrouck, Deburghgraeve ou Hellebaut (gn-a 4 ans) ?
Si en preumî, i gn-a l’mentalitè, d’s-autès-afêres vèn’nut s’ajouter. No payîs, puce qui c’èst l’min.me dès deûs costès, a dandjî d’ène aute politique spôrtîve. Tèrtous sént bén qu’lès spôrts sont lès parints pauves du payîs. Etou, lès-infrastructûres sont st-en r’târd pa rapôrt à bran.mint d’payîs. I faureut cominchî pa z-ècourâdjî lès djon.nes dins lès scoles. Mins pou ça, faureut-i co awè dès stâdes, dès batumints, dès pisses, dès pissines,… Dès liârds qwè !
Mins gn-a tout d’min.me yeû dès bons momins avou dès-ètranjèrs come Usain Bolt au 100, 200 èt 4 fwès 100 mètes, èl nadjeû Michael Phelps, l’èquipe di basquèt dès USA, èl Mèc.sique en fotbale, Serena Williams èt Andy Murray en tènis ou co bén min.me Oscar Pistorius dins l’quate côps quate cints mètes.
El cèrèmonîye d’ouvèrtûre èsteut rock n’ roll, èl cène di fèrmetûre ètou. Et c’èst tout d’min.me in bèlje qu’a dèclârè fini lès djès d’Londes.
Dins quatre ans, Londes s’ra roubliyî. Nos s’rons à Rio. El Brésil nos ratind dins mwins di 1400 djoûs.
El raploû èst pris. Dj’èspère qui nos spôrtifs walons rècoltront pus di mèdaîyes. Mins pou ça, bran.mint di suweûs s’ront lèyîes dissus lès pisses, lès tèrèns, lès tapis ou dins l’eûwe dès pissines.