Pocwè çki dj’ doereu leyî mes vîs soçons so l’ costé, li vicåreye ki dj’ a viké, mi famile ki dj’ voe tant voltî, po-z awè moens di panse et ene cåme come a vint ans ?
Asteure, dj’ a l’ ådje di plus esse pus amichtåve po sopoirter tot çk’ i gn a dins m’ tiesse et nén todi trover a rdire dissu m’ vireusté.
Dji so divnou m’ soçon…
Dji n’ mi plind pus d’ awè mougnî ene gougouye di trop, di n’ nén awè rployî m’ lét ou d’ awè stî å botike por ene biestreye ki n’ mi sièvrè a rén.
I m’ shonne ki dj’ a bén gangnî l’ drwet d’ fé a m’ môde et m’ moenner come i m’ plait d’ el fé. Cobén end a dj’ veyou dins mes soçons k’ ont ddja rwangnî les stoeles, sins awè polu sondjî a tot çk’ il årént polu fé ådla d’ leu swessante-cénk ans ?
Kî çki m’ è vôreut d’ lére on live (sovint e walon) ou di dmorer disk’ a totes les eures a djouwer dsu l’ Toele avou m’-n éndjole ?
Dji m’ fwai on råle plaijhi di dmorer dins m’ payasse, tot rwaitant m’ boesse ås imådjes, ossu lontins ki dj’ vou.
Dji pou danser so des airs di muzike des anêyes swessante et sondjî a braire so m’ mayon k’ dj’ aveu pierdou, dins l’ minme minute.
Si dj’ vou, dji m’ irè bagnî dins l’ grande basse padvant les djeriådès ouyådes des viyès gurnouyes di benitî, avou m’ coulote schetêye, trop ptite po co rastini mi grosse panse et mes agayons.
Pacô, dji roveye. Mins ça, i gn a bén des afwaires ki meritnut k’ on les roveye.
Dji n’ mi sovén pus k’ des bounès paskeyes ki dj’ a viké. Bén seur ki m’ cour est plin d’ coixheures. Mins ces coixheures la m’ ont dné l’ foice di plu tot sopoirter, comprinde et fé ene croes dsu.
On cour ki n’ a pont cnoxhou d’ sofrance ni pôrè djamåy awè l’ tchance di conoxhe li plaijhî d’ viker, pacô, foû des rayes.
Dj’ a l’ tchance d’ awè viké vî assez po wangnî des tchenous tchveas, et mes kéntes di rire sont bén markêyes dins les royes di m’ vizaedje.
N a bråmint ki n’ ont yeu waire di tchance di rire, divant d’ awè des blancs dsu leu tiesse.
Dji so divnou vî ! Mins dj’ a bråmint wangnî a mia conoxhe les djins. Dj’ a wangni l’ droet di m’ brouyî. Et po l’ bén vos dire, dji so bén binåjhe insi.
Dji m’ voe voltî !
Dji n’ vicrè pus des anêyes, mins tant ki dj’ serè la, dji n’ årè pont d’ tins a piede avou des rgrets so çki dj’ åreu plou esse, et m’ tracassî di çki m’ arivrè.
Et si dj’ end a håsse, dji frè a m’ môde come dabitude !
Dji vou dmorer vosse soçon po todi.
C’ est m’ cour k’ a cåzé – djåzé po les Lidjwès, pårlé po les Tchålerwètîs, canter po les djins d’ El Louvire, tchanter po les Årdinwès, sins rovyî les Gåmès.
Riyans on bon côp, c’ est bon po vosse tiesse !