Djë so trop vî po candjî

Èn årtike di Wikisource.
Ciste ouve ci egzistêye eto divins ds ôtès ortografeyes : Rifondou walon.
Djë so trop vî po candjî

Djë so trop vî po candjî

Poqwè ç’ qui dj’ dwèreû lèyi mès vîs soçons su l’ costé, li vikaîrîye qui dj’a viké, mi famile qui dj’ veû tant voltî, po-z-awè mwins’ di panse et one caume come à vingt ans ?

Asteûre, dj’a l’âdje di plus yèsse pus amichtauve po sopwârter tot ç’ qu’i-gn-a dins m’ tièsse èt nin todi trover à r’dire dissu m’ vîreûsté.

Dji so div’nu m’ soçon…

Dji n’ mi plind pus d’awè mougnî one gougouye di trop, di n’ nin awè r’plôyî m’ lét ou d’awè sti au botique por one bièstrîye qui n’ mi sièvrè à rin.

I m’ chone qui dj’a bin gangnî l’ drwèt d’ fé à m’ môde èt m’ min.ner come i m’ plaît dè l’ fé.

Combin ènn’a-dj’ vèyu dins mès soçons qu’ont d’djà r’gangnî lès stwèles, sins awè polu sondjî à tot ç’ qu’il ârîn polu fé au d’là d’ leû swèssante cinq ans ?

Quî ç’ qui m’è voureût d’ lîre on lîve (sovint è walon) ou di d’morer jusqu’à tote lès-eures à djoûwer d’ssu l’ twèle avou m’n-indjole ?

Dji m’ faî on râre plaijî di d’morer dins m’ payasse, tot r’waîtant m’ bwèsse aus-imaudjes, ossi longtimp qui dj’ vou.

Dji pou danser su dès-aîrs di musique dès-anéyes swèssantes èt sondjî à brêre su m’ mayon qu’ dj’aveû pièrdu, dins l’ minme minute.

Si dj’ vou, dji m’îrè bagnî dins l’ grande basse pad’vant lès djèriaudès-oûyâdes dès vîyès guèrnoûyes di bènitîs, avou m’ kulote chètéye, trop p’tite po co rasténre mi grosse panse èt mès agayons.

Pa côp, dji rovîye, mins ça, i-gn-a bin dès-afêres qui mèrit’nut qu’on lès rovîye.

Dji n’ mi sovins pus qu’ dès bonès paskéyes qui dj’a viké. Bin sûr qui m’ keûr èst plin d’ cwachûres. Mins cès cwachûres-là m’ont d’né l’ fwâce di p’lu tot sopwârter, comprinde èt fé one crwès d’ssu.

On keûr qui n’a pont conu d’ sofrance, ni pourè jamaîs awè l’ chance di conèche li plaîjî di viker, pa côp, foû dès rayes.

Dj’a l’ chance d’awè viké vî assez po gangnî dès tchènus tch’vias, èt mès quintes di rîre sont bin marquéyes dins lès rôyes di m’ visadje.

‘N’a branmint qui n’ont yeû wêre di chance di rîre, divant d’awè dès blancs d’ssu leû tièsse.

Dji so div’nu vî ! mins dj’a branmint gangnî à mia conèche lès djins. Dj’a gangni l’ drwèt di m’ brouyî. Èt po l’ bin vos dîre, dji so bin binauje insi.

Dji m’ veû voltî !

Dji n’ vikerè pus dès-anéyes, mins tant qui dj’ sèrè là, dji n’arè pont d’ timps à piède avou dès r’grèts su c’qui dj’âreû p’lu yèsse, èt m’ tracassî di ç’ qui m’arivrè.

Èt si dj’ènn’a ausse, dji frè à m’ môde come d’abitude !

Dji vou d’morer vosse soçon po todi.

C’èst m’ keûr qu’a causé — djauser po lès Lidjwès, pârler po lès Châlèrwètîs, canter po lès djins dè l’ Louviére, tchanter po lès Ârdènès, sins rovî lès Gaumès. —

Rians-n’ on bon côp, c’èst bon po vosse tièsse !